就業未掂
2014/5/5 上午 09:43:10
網誌分類: 經濟
美國4月就業數據有點混淆，令股市先升後回，非農就業數據遠好過預期，失業率降至五年半低位，但失業率基數中的就業人數下跌困擾市場。杜指朝早抽高62點，但升勢有如曇花一現，隨即榭曬，插水92點，由升轉跌，其後逐步向下。杜指收市跌46點，報16513點；標普500指數跌3點，收1881點；納指微跌4點，造4124點。全個星期，美股三大股指都造好，杜指和標普500指數齊漲0.9%，納指跑贏大市，彈1.2%。
4月非農就業人數猛增28.8萬人，係超過兩年以來最高，且遠高過市場預期的21萬，顯示嚴寒冬季過後，經濟成長加速。今次公布還將早兩個月的數字大幅調升，2月非農業就業新增職位由19.7萬調高到22.2萬，3月數字由19.2萬調高到20.3萬。
這本來是重大利好，市場期望失業率亦朝同一個方向發展，表面看亦是如此。失業率更意外地由6.7%降至6.3%，是半五年半的低位。就業數據亮麗的消息，的確提振了股市，但升勢短暫，好快就頂唔住。主要原因係大家睇真啲之後發現，失業率之所以驟降，全因為美國國勞動力大跌超過80萬，如果勞動保持不變，失業率其實係6.8%，較3月上升0.1個百份點，而唔係下跌。勞動參與率(即是能做嘢又有搵緊工的比率)只有62.8%，係1978年以來最弱，80萬人退出勞動市場亦唔係少數目。正當大部份人預期有更多人重投勞工市場，數字出來卻是大量人退出，難免令人失望。
另外，深入睇睇就業分佈情況，就業人數猛增，與此前認為係受天氣回暖帶動，係嚴寒天氣滯後反彈嘅分析，有些出入。因為最受天氣影響的建造業及礦業的職位增長，與天氣最差的2月差唔多，無因天氣回暖而上升。因此，好多分析認為美國第一季度經濟轉差，主要係受天氣影響的講法，並不正確。
總體而言，勞工就業情況是經濟的命脈，今次出來較混亂的訊息，令人難下結論，所以股市就先升後回。呢個負面消息唯一正面訊息，聯儲局收水已成定局，若勞工市場未得，明年初點加息?
另一個壓住大市後腿嘅力量係烏克蘭危機升級令市場感到緊張，投資者唔願入市，交投淡靜。上周五紐交所交易量只有57億股，遠少過去五日的平均值67億股。
烏克蘭黑海港口城市敖德薩(Odessa)爆發親俄與反俄群體衝突，衝突中有超過40人喪生。這是自2月烏克蘭前總統亞努科維奇(Viktor Yanukovich)被逼落台後最嚴重的暴力事件。美國奧巴馬唔想出兵，唯有出口術，佢回應話，如果俄羅斯試圖在烏克蘭搞破壞，將對俄羅斯實行進一步制裁。
事實上，包括美銀、花旗等多家美國銀行，今年初已開始削減持有俄羅斯資產。從銀行提交給美國證券交易委員會(SEC)的季度報告中顯示，美銀一季度對俄風險敞口削減了22%，花旗亦減低了9%。花旗在報告中表示，雖然俄羅斯和烏克蘭的政治緊張局勢尚未對業績産生實質性影響，但針對俄羅斯有可能遭歐美進一步制裁，對業務將産生負面影響。俄羅斯則以威脅下月起削減對烏克蘭天然氣供應，作為反擊。地緣政治局勢緊張，股市難免受阻。
陸羽仁
回應(11) 我想回應
陸羽仁 BLOG 舊文
