魚樂無窮：資金潛伏房託有玄機 - 唐牛
■房託股近期成交顯著增加，趙國雄任主席的置富上星期五大成交突破橫行區，一旦突破6.6元，隨時可見7元。資料圖片
《蘋果》財經版上星期做咗個散戶調查，因版位關係未有刊出，但結果卻與預期有點出入。調查共訪問為數逾百散戶，發現今年有錢贏嘅不足兩成，接近四成埋單要輸錢，其餘近半打和白做。雖然恒指至今跌約半成，但年初爆升股比比皆是，如科網、手遊、支付、環保、醫藥等。調查再一次反映，大部份散戶依然未適應跟紅頂白嘅炒法，如今炒風已過，唔知唞到幾時，輸家要收復失地，難度更大。
美國10年期債息先升後回，逼近年初低位，何解？原來關鍵在於剛出爐嘅4月就業報告，新增職位達28.8萬份，失業率跌至6.3%，全部較預期優勝，但原來勞動參與率再創35年低位，意味失業率大幅回落皆因失業人士放軟手腳，經濟進一步轉強之說有點牽強。
領匯置富各有賣點
債息回落，儲局加息步伐或會放慢，息口敏感股有望再次抬頭。其中房託股近期成交顯著增加，說不定資金睇好有一輪炒作。如果從基本因素出發，領匯(823)乃不二之選，市傳公司正放售多個商場及商舖項目，全屬非核心項目。
是次出售整批物業估值10億唔夠，但背後意義重大──公司未來將透過買賣，進一步提升物業價值，而非做被動式收租佬，前景值得看高一線。
從圖表出發，置富(778)則非常靚仔，上星期五大成交突破橫行區，正向另一阻力區6.6元進發，一旦突破，隨時可見7元。
唐牛
上一則: Follow Me：南車時代博34%升幅 - 高彰坡
下一則: 股場放大鏡：內房水泥有排無運行 - 歐陽風
魚樂無窮 - 唐牛 舊文
