經濟未真好
2014/5/26 上午 09:19:34
網誌分類: 經濟
美國股市上週五的焦點係全球第一大個人電腦生產商惠普(HP)，惠普第二季營收為273億美元，略低於市場預期的274.1億美元，而惠普週四宣佈預計全年每股盈餘(EPS)為3.63-3.75美元，中值亦低過預期的3.71美元，惠普週四跌1%，拖住大市後腿，不過佢過一日就嚟料啦。
惠普集團行政總裁惠特曼(Meg Whitman) 上週五公佈減肥方案，主要係減低對個人電腦業務的依賴，轉而發展面向企業的計算設備和網路設備。她表示惠普正考慮進一步削減既非直接面向客戶、又不在創新計畫中的非核心部門， 計劃裁減最多1.6萬個工作崗位，至於全球邊個區域裁員幾多人，未有透露。
中國地區的業務方面，惠特曼稱仍然存在挑戰，不過當季的營業額仍有增長。惠普大裁員，員工自然腳軟，但投資者就開心啦，大幅裁員，等如大幅縮減開支，可以即時提升公司盈利，對股價有振奮作用，惠普上週五大幅抽高6.1%至33.72美元，係表現最好的標普500指數成份股。
惠普大裁員有其行業因素，亦有其普遍性。行業因素係移動互聯網興起，人人都用手機和平板電腦上網，在美國用移動工具上網人數早已超過桌面電腦，所以第一大桌面電腦生產商惠普有幾頭痕可想而知。轉型係被逼的，但借轉型大裁員，就係將負面消息轉為正面的手法。
至於普遍性，我好多在不同美企打工的朋友都話公司在裁員，佢地來自的公司金融、消費品、電訊樣樣齊，所以我覺得都唔少美國公司做生意上線營業額無乜增長，開始用落刀斬成本的方法，維持下線盈利增長。推而廣之，你話美國經濟大好，又唔係咁像。
另外美國4月獨戶新屋銷售量較上月增長6.4%，年化的總量增至43.3萬幢，高過市場預期的42.9萬幢，亦超過上月經上調後的40.7萬幢。而同期的二手房銷售數量增長1.3%，亦為12月以來的最快增幅，也是今年首次上漲。受好過預期的樓市數據刺激，地產股大漲。美國第一及第二大的房屋建築商D.R. Horton及Lennar Corp齊漲超過4%。房屋分類指數升1.9%，領漲大市。
美國4月新屋銷售明顯反彈，但好過預期唔等如實際好好，數字仍然明顯低過去年同期的45.2萬幢的水平。有經濟學家指出，過去一年，房屋銷售一直受到房價上漲和利率從低位回升的約束。在新屋銷售數據公佈之後，高盛公司將美國第二季度GDP增長預期從3.8%下調為3.7%。又係一個經濟唔係好得咁緊要的指標。
種種跡象預示，聯儲局明年開始加息，但又唔可以加得太多太快啦，否則經濟點頂得順。
陸羽仁
回應(2) 我想回應
陸羽仁 BLOG 舊文
