魚樂無窮：億和帽子戲法贏開巷 - 唐牛
■億和主席兼大股東張傑密密增持公司股份，睇好前景，值博率十足。資料圖片
五窮月反高潮大升近千點，踏入六絕月大市又會點行？本月焦點繫於內地會否再爆發錢荒，但觀乎阿爺頻頻放水，成功壓低拆息，歷史未必會重演，加上世界盃月成交例靜，一旦A股回勇，港股要挾上話都冇咁易。
今日推介產銷模具及零部件嘅億和(838)，貪佢有齊業績標青、股東增持及圖表靚仔三大優點，目標價兩蚊樓上，潛在升幅三成！
率先盈喜走勢靚絕
講業績，億和率先發盈喜，先拔頭籌！公司受惠營業額顯著上升及成本控制得宜，今年首四個月盈利，已超出2013年全年，好勁！睇番億和舊年全年賺6,605萬銀，以年度化推算，今年盈利起碼兩億銀，重返2011年水平，當年股價一度逼近四蚊，較現價高出1.6倍，現階段低殘程度達十級。
業績靚仔，股東搶先增持，梅開二度！主席兼大股東張傑，上月中起密密增持公司股份，平均價介乎1.433至1.5元，現價介入比大股東貴最多十格，但上望空間更大，夠曬值博率。
睇埋圖表，完成帽子戲法！日線圖剛升破圓底頸線，短線動力一流，睇周線圖更靚仔，一旦衝穿上年5月高位1.57元，下一目標要睇兩蚊樓上，爆發力十足。最後賽果，億和三比零大勝！
廣告一則︰唐牛facebook專頁正式開通，歡迎戰友嚟畀個like，交流作戰心得，集思廣益。
唐牛
https://www.facebook.com/tongcow88
【壹錘定音.李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk
上一則: 炒友Blog：中聚谷電動車潛力大 - 邱古奇
下一則: 股場放大鏡：股仔似翻炒錦恒可博 - 歐陽風
魚樂無窮 - 唐牛 舊文
