目標不同 策略迥異
2014年06月03日
假期間有些消息會影響節後大市，包括內地5月份製造業採購經理指數(PMI)升至5個月高位，長實(001) 的環宇海灣推貨成功加推，基本上都係利好少少的消息。
先講中國官方公佈5月份製造業採購經理指數(PMI)升至50.8，較市場預期的50.7為佳，指數在1月觸底後一直反彈向上，5月反彈力度大過預期。細分之下，內地大公司PMI報50.9，按月升0.1，中型公司PMI升1.1至51.4，但小型企業維持48.8無郁，仍位於50的榮枯分界水平之下。
PMI好 支持國指
早前公佈的匯豐PMI同樣勝預期，顯示官方數字水份不多，阿爺推低人仔微調救經濟的措施漸漸收效，大中型公司吸納出口定單較快，中小企復甦落後一點，但估計它們稍後也會復甦。近期國指走勢落後於恒指，估計主要擔心大量信託到期出現錢荒，如今PMI好過預期，對國指有支持。
我上周一話長實(001) 食到個勢推荃灣環宇海灣，樓市會有一個小陽春。結果長實推盤順利，股價上周再上新高。長實在上周末開售首天沽清近600伙後，即晚加推354伙，大部份原價加推，小部份因坐向景觀輕微提價1、2%。
長實執行董事趙國雄周日話，項目至今已共推945伙，超出原先預算推售800伙，預計銷售可以超標咁話。
現小陽春 不宜高追
正如我上周一講，長實帶起呢個樓市小陽春，可以令地產股炒番一浸，推高大市。但如今佢哋已經升咗唔少，雖然我估本周若環宇海灣加推亦去貨去得好的話，地產股仍可以衝一衝，但佢哋近期升勢頗急，高追就不宜啦，若手上有貨，不妨見高食番一轉胡仲實際。之前期指結算時，睇淡6月市況者太多，大戶夾住唔放，可能要再夾上一段，殺埋啲淡友才回吐。
另外可以講講對上的星期天，我和一班網友聚會。見到好多網友，雖然素未謀面，但感覺好似認識了已經6、7年的朋友。好多網友與我之前的想像好唔同，好似肥奧原來唔肥、馬仔原來係女仔之類。
聚會中，到過不同嘅台與唔少網友傾偈，印證了我一個諗法。睇陸羽仁專欄的人，各樣類型都有，長線、中線、短線，投資、投機、賭博，每個人的投資取態都唔同。我一直相信，世界上沒有一劑靈丹妙藥，畀唔同嘅人食，都可以醫好唔同嘅病，個個都健康快樂。
一個冧巴 不同玩法
舉個例，年幾前，我見到合和(054) 喺灣仔搞得幾有起色，手持靚地，股價大約20元多少少，好有價值，於是建議大家可以留意。結果一年之內，合和股價在去年3月炒上接近35元的高位。之後政府推雙辣招打壓樓市，地產股碌番落嚟，合和去年9月跌番去低位23元，之後慢慢彈，現價唔夠27元。
同一個冧巴054，如果你日日問住我，我叫過你買，我見到政府出雙辣招，唔係幾對路，自然會提醒你：合和已經升到30幾蚊，可以考慮沽出啦。但我這些專欄作家，日日講嘢，亦好快唔記得，建議你買貨，未必記得會提醒你沽貨。況且長揸與短炒唔同，如果你係諗住長線投資，無放貨，無所謂，揸吓又無妨；但如果你係短炒，你又可能會怨我：點解升到上30幾蚊，唔通知我走呀？家又變番20幾蚊，同入貨時相差唔遠！所以畀冧巴人唔係咁易。同一個冧巴，不同時期都有不同玩法。我覺得呢個世界，沒有無敵的冧巴，只有無敵的投資者，只要你用啱投資方法，就係無敵啦。
短炒期指 好易夾死
網聚中，網友提出了不同的問題，反映了不同人的不同投資取向，我對唔同人可以講唔同的說話。個案一，有位中年女士問我期指結算點睇？估計高位結算，抑或低位結算？(當時講緊5月結算)佢好明顯係短炒。我見佢面有難色，即時反問佢一個問題：你沽咗期指嗎？她回答係，大約在22000點沽。我答佢：家似夾高，至於幾時到頂，當期指大戶夾死晒啲散戶，就會收手嘞。到你都忍唔住要平倉時，個市就升到差唔多啦。你唔使問我，睇吓自己，睇吓身邊的散戶就知。
聽落好恐怖，又好殘忍，但這是現實。要準確估計大市會去到邊個位置，十分困難，要贏錢，當然唔易。不過，大戶只要將散戶做緊嘅嘢，當做一個指標，同散戶對賭，睇住個指標做嘢，就穩賺無賠啦。所以問大市幾時回頭，就要睇幾時殺晒所有散戶。我當日同嗰位女士講，如果大家見到某日出現夾升400、500點，夾到散戶打晒靶，大市就差唔多係時候回頭，不過呢幾日都無見到這種情況，恐怕散戶未完全投降，個市可能仲會再夾高啲。我舉出這個例子，想說明的是，炒期指的散戶要想知道一個確實的答案，事實上他的反面，就係那個答案。
個案二，有網友「冒失雙子」(如無記錯)屬中線投資者。我問佢睇咗我個專欄，投資狀況如何？佢話幾好呀，以前年年都輸，睇完之後就冇再輸，呢兩年仲有近10%回報。我話股神巴菲特每年回報都只係15%，你已經好接近股神啦。佢笑笑口話，股神嘅投資組合咁大，高回報梗係難啦，佢咁細投資，當然容易啲。佢話前年好啲，舊年組合本來只有2%、3%回報，不過在年尾抽咗啲新股，追番啲，又話抽新股其實都幾「騰雞」，所以上市第一日就放晒。
低位入市 望食一成
我回答話，佢作為一個中線投資者，都唔錯啦，年年有10%回報，OK呀。若然去年長揸股票回報低，可能係睇位睇得太盡，買唔夠貨，所以賺唔到下半年的反彈浪。不過佢到年尾抽新股補夠都得，成功的方法就係好方法。
新股的特色係，唔熱時賺唔到錢，熱的時候買新股，要識睇基本因素。所以上市第一日如果唔沽，揸一排，個市一靜，就好易上身，走唔甩，下一浪新股熱潮到時，也未必興同樣的股，所以若對買的新股認識少，第一日就要閃。中線投資者就長棍短棍並用，揸貨唔夠，個市熱炒新股都得，比較靈活應對。當然如果每年把握得到時機，低位入市，揸吓大股，然後坐一坐，賺佢10%，應該唔難。
低位入市 易享高息
個案三，網友小潘，他的問題好簡單，想買一些比較高回報的股票，唔使經常郁。佢話我當年介紹嘅越秀房託(405) ，好正呀。我答曰：405舊年上到接近5蚊，最近回落，得番3.7元，你高位無沽呀？佢話唔緊要，佢買嘅時候只係兩個幾。我話作為長線投資者，越秀房託去年升得咁急，沽少少本來唔拘，但一般人沽咗未必識買番，唔沽都無所謂(若然去年高位沽咗，家可以買番)。405現價3.7元，有7.5厘息，佢兩個幾買，以買入價計息率有10%以上！揸住405，等如揸住部份廣州商用物業，定期有租收，又有人幫你管理，乾手淨腳，其實都唔錯。作為長線投資者，其實都係想搵到相對比較穩定的回報。只要能夠在價錢比較低的時候入市，長期揸住，已經OK。佢入貨價較低，現價可以增持。
我同大家講這個網聚的見聞，目的想告訴大家，每個人的投資目標，各有不同。要做短線炒家，一定要好醒，要避開做大戶對家，難度好高，若然想試，都要先計輸後計贏，輸得起至好玩。
相對地，做中長線投資者，比較容易，揀些穩陣的大股，吼佢比較低價的時候買入，見到有十幾個巴仙升幅就沽出。呢幾年上落市，呢種做法都搵到食。若然自命是長線投資者，揸啲有息派的穩陣股，每年在低位入貨，年年累積，只買不沽。投資要賺到錢，一定搵到正確方法，同一個冧巴，長、中、短線唔同。
至於甚麼才是正確方法？大家可以睇睇自己最近幾年的投資方法，如果總是輸錢的話，這些方法就是錯的，不再使用這些錯誤方法，避開錯誤，慢慢可走向成功。
陸羽仁
金融High Tea 舊文
