買股收息
2014/7/25 8:57:55
網誌分類: 經濟
美股繼續進行唔係調整的調整。杜指跌2點，標普500指數升1點上高位，納指跌1點。中國和歐洲的採購經理指數都得，支持著大市。美股唔回，港股料會繼續炒吓。
昨日比較惹人注目的是亞馬遜的業績差過預期。呢個網購巨人上季營收193.4億美元，和預期的197至215億美元接近。但每股虧損27美仙，就遠高於預期的15美仙。佢更預新一季唔止繼續蝕，仲要蝕4.1億至8.1億，遠多過市場估計。亞馬遜業績差過預期，令佢股價在收市後交易大跌10.5%。
講番香港，近日唔少讀者問我好唔好認購第四批通脹掛鈎債券(iBond，4222)，佢好似好熱吓，只計7間經紀行數字，首兩日現金及孖展認購金額約12.8億元，有4.4萬人認購iBond。
至於好唔認，其實幾簡單，呢個係政府派錢行為，如果你橫豎有錢放錢行，改為買佢唔揸現金，都有3厘息呀，無壞。但由於唔會認得多，所以認到都有限，發唔到達，亦無大礙。
其實若論基本因素，H股仍然落後，想收息我就買股，例如中行(3988)
，雖然升咗唔少，但現價3.62元都係5.1倍市盈率，有6.9厘息率，雖然現價距52週高位3.79元，只差4.7%，但如果市況短期續好，佢有條件上穿高位。 退一步講，即使你燈到咁，一買即大插，佢跌番落52週低位3.03元，收佢6.9厘息坐吓亦無壞，好過放錢在銀行。內銀唔係無風險，但隨著近日中國經濟改善，佢地大爆炸的風險又減低咗啲。我買股都係鐘意買啲有息派的股票，高息仲好，過去都有此經驗，買啲有息收的股票，入市位唔好，買入升咗啲無走，隻股又插番落去，但勝在有息收，坐番半年一年，又升番上去，賺息又賺埋價。當然，你話你忍得，我而家升市唔買股，中行唔等到佢3.03元買，都等佢回番一成去到3.26元先至買，亦得，但咁就要有少少耐性。
陸羽仁
回應(1) 我想回應
陸羽仁 BLOG 舊文
