中行事件有手尾
2014年07月10日
朝早有起身睇波的球迷，見住巴西隊被德國隊係咁魚肉，多數擁森巴足球的球迷，當堂想喊；有啲無校鬧鐘的球迷醒遲咗，聽見巴西上半場已經輸五球，以為發噩夢之餘，索性繼續瞓覺算數。經歷完傷心的晨早，點知到港股開市，又經歷一場屠殺，大批牛友被人鋸到一頸血。
港股一下插落嚟，第一浸係插美股調整過百點拖累，恒指低開133點報23408點，衰咗半日。隨後內地公佈上月CPI及PPI數據差過預期，央視又指中行(3988) 旗下「優匯通」業務涉嫌洗黑錢，中行全日跌2.8%，報3.49元，大市跌勢轉急，插第二浸，十天及廿天線相繼失守，加上內地股市低收，拖累港股午後最多瀉415點，低見23126點。尾市沽盤收斂，但恒指收報23176點，仍急跌365點；國企指數收報10341點，跌163點，成交金額640億元，跌市成交加大，七一後單日爆上的升幅全部報銷晒。
中環茶友話，阿爺由中央台報晒中行打出界球(唔係擦邊球)幫人調錢出國，涉資300億，過去呢啲嘢唔會咁高調公佈，?家執正嚟做，估計有手尾，中行業績好，呢兩個月抽咗上去，但去到近3.8元頂回落，睇嚟仲有得回。
又有資金流入
正以為資金動向告一段落，金管局就因應港匯持續強勢，向銀行體系注入19.38億元承接美元沽盤，令本周五銀行體系結餘增至約1820.73億元。一跌市又有資金流入，又幾應景喎。呢次注資應該有助氣氛，但會唔會令個市彈番，就要睇埋美股會唔會穩番。
呢排地產新盤賣得唔錯，信置(083) 銷售白石角新盤去咗唔少貨，不過股價似乎已經反映咗，昨日佢跌了4.2%，是表現最曳藍籌。收市後地政總署公佈天水圍兩幅住宅地招標結果，全部由新地(016) 投得，兩幅用地地價總計為41.9億元。新地近一、兩年買地數量唔多，今次連執兩塊地，估計係低價執雞策略，今年佢口號係月月有盤推，雖然樓盤有大有小，但累積回籠資金唔少，用平價投地，就當作補充原材料，對市場消息屬於中性，佢同其他地產股一樣，都已經因為新盤好銷升咗唔小，短期要消化吓升幅。
大市雖然回落，但本地電訊股就受惠於加價消息逆市造好，香港電訊(6823) 變相加價後，和記電訊(215) 旗下3香港取消封頂月費，股價逆市攀升6.6%，數碼通(315) 也升1.7%，造10.5元；電訊盈科(008) 上揚1.5%，造4.72元；香港電訊持平，企穩9.19元。
網絡股續炒加價
過去本地網絡商曾經醞釀過加價，當時由數碼通提出，可惜市場反應負面，網絡商紛打退堂鼓，喺用戶同消費額逐漸飽和下，網絡商加價不成，股價由高位回落，調整幅度有三成咁多。今次網絡商借住香港電訊併購，調整「套餐」價錢，現時好多人都變咗「低頭族」，無帶手機出街仲慘過無帶銀包，加上網絡商要保持利潤，就要提高價格，客觀環境加價條件比之前成熟，從股價顯示市場有信心對佢地可以增加收費。
翠華(1314) 遭基金股東減持5000萬股，當中4000萬股以3.41元上板，翠華全日失配股價收市，收報3.35元，挫近10%。翠華雖然由高位5.75元跌咗唔少，但市盈率仍接近30倍，比盈利穩定的大家樂(341) 的27倍仲係高。
陸羽仁
金融High Tea 舊文
