有胡速食
2014年07月04日
港股周三大升後，股民個個都呆一呆，唔知個市搞邊科，買又唔係、沽又唔係。昨日大市窄幅上落，以前日大升過百點計，調整幅度唔算大，市場睇緊資金流向。
大連港炒新區概念
大市好淡角力。恒生指數收報23531點，跌18點；國企指數收報10454點，升6點，成交金縮減至566億元。個別股份繼續炒吓消息，有傳濟南正研究取消限購，內房股大致造好，中海外(688) 升1.7%；潤地(1109) 成最標青藍籌，全日走高2.2%；恒大(3333) 、萬科(2202) 等都造好。
另外，國務院發佈同意設立大連金普新區， 大連港A股升停板，H股(2880) 升幅更勁，收報2.29元，狂升17%。
講番資金流，金管局係周六因應港元轉強入市買美元，呢個動作被理解為有錢流入，依家就睇情況係咪持續。
金管局解釋熱錢流入係有併購同派息，故此調錢入嚟香港換成港元，若然呢個講法無錯，等如有筆新錢以股息形式入咗香港，但整體數目唔算好多，所以個市短期動向，要睇資金會唔會陸續增加。以往港元若然出現強勢，會維持一段時間，如果今次金管局入市只係兩日就停手，情況就較少見。由於美股係高位整固緊，估計市場會繼續留意資金流變動。
另外，近排A股氣氛似乎好番啲，中國官方非製造業採購經理指數(PMI)跌至55；匯豐中國6月服務業PMI升至53.1，均處於擴張水平，顯示經濟向好。四大行6月新增貸款2900億人幣，全行業新增貸款估計可達萬億。上證指數連升4日，昨收報2063點，升3點；深成指報7335點，升25點。
新股綠葉定價攞到盡
內地新股炒味濃，香港新股數目眾多，暫時仲係個別發展，河南證券商中州(1375) 掛牌後股價企穩，昨稍為炒上。呢排比較搶眼嘅係花樣年(1777) 分拆出來的管理公司彩生活(1778) ，昨日股價再爆升14%。彩生活招股僅超購三倍，但首日掛牌已經爆升30%，現時更累升47%。
彩生活是內地大型物業管理公司之一，於2013年獲中國指數研究院評定為中國最大社區服務運營商。集團擁有三個主要業務分部：物業管理服務、工程服務，以及社區租賃、銷售及其他服務。
在香港，物業管理多數係大型發展商經營，幾乎已變成寡頭壟斷，由於收入按支出計算，成為一盤穩定生意，但亦唔算係一門高增長的生意。此行業在內地仲處於發展階段，呢個概念被人炒高，依家彩生活市值已經去到50幾億元，最重要嘅當然係貨源歸邊，炒起上嚟無乜人阻頭阻勢。
個市穩定番，新股市況都好咗，市傳獲14倍超購的綠葉製藥(2186) 定價攞到盡，將以上限5.92元定價，發行9.99億股，集資59.14億元。
新股暗盤都好咗，污水處理商康達環保(6136) 暗盤報2.99元，較招股價高7%，該股超額認購254.23倍。另一隻涼茶品牌鴻福堂(1446) 暗盤報1.43元，較招股價高10%，該股超購347.8倍倍。照今年新股表現，呢類大熱股份最好都係趁高速速食胡。
陸羽仁
金融High Tea 舊文
