股場放大鏡：兩隻細價殼股等落鑊
全城瘋炒細價股，昨日升幅逾10%的股份有廿多隻，中播控股(471)公佈收購?星資產，股價急升100%，市值由4億元多增至逾8億元，中國天然氣(931)正就內蒙發展液化天然氣業務磋商，公佈兩日後依然有炒作效應，再升23%，但最具效應都算萬威國際(167)，公佈稱主要股東擬賣出持有股權，繼權智(601)後另一隻賣殼股，其他有機會賣殼股仔仲唔炒到瘋癲。
迪臣現價大平賣
繼續搵殼股炒，迪臣發展(262)諗得過，昨收市價計市值4.5億銀，肯定係細市值股中的上車盤，睇市值外再睇NAV，有成1.76元，現價PB僅0.36倍，上年度每股盈利0.262元，市盈率講緊僅3倍。數據正鬥，集團主要業務包括以總承包商從事建築及裝修業務、提供機電工程服務、物業發展及投資、買賣醫療設備及家居保安等。去年度全年業績迪臣營業額飆升25%至歷史新高的9.8億元，股東應佔純利約1.45億元，勁升197%。盈利當中包括投資物業之公平值增加顯著升至9,191萬元，同時出售附屬公司收益1,605萬元。承建商股有資產有龐大合約收入，呢個市值絕對係大平賣。
另一隻係毅興行(1047)，集團主要從事塑膠原料、色粉、混料及工程塑料製造及買賣。呢隻老牌工業股昨收市價計市值2.66億銀，又係數一數二低市值股，數據方面NAV有1.288元，現價PB僅0.48倍。毅興行去年賺5.9仙市盈率12倍，作為一隻乾淨殼股，炒作條件相當足夠。
歐陽風
歐陽風
股場放大鏡 - 歐陽風 舊文
