油的疑惑
2014年09月12日
美元強勢在投資市場掀起巨浪，餘震昨日繼續。傳統上美元強不利油價，結果令油價大插，布蘭特期油連續五日下跌。本來油價下跌應該利好股市，不過，石油股捱沽，近月當炒的三桶油昨日齊挫逾1%，對大市氣氛不無影響。
油價過去係影響股市重要因素之一，由於能源成本影響生產價格，油價升等如通脹勁，一旦經濟過熱，央行就要加息，特別係對美國呢啲工業國，油價同股價往往榮辱與共。不過，自從新經濟崛起，傳統工業股影響力不斷下降，股市對油價敏感度減低。
近幾年，美國大力開採頁岩油同頁岩氣，逐漸由石油輸入國變成輸出國，美股對油價敏感度減低，甚至有分析話，美國搞到中東亂晒龍，其中一個原因係想推高油價，因為家美國係賣油國，中國係買油國，輪到美國佬唔想油價下跌。
油價唔再直接牽動美股情緒，但市場仍然用佢作為觀測全球經濟的指標，油價今次唔係小跌，而係大跌，我係網誌形容為「完美風暴」，佢咁跌法，有人話唔係對股市同中國有利咩，疑惑點解個市咁差？最直接嘅解讀係油價大跌代表經濟唔好，特別係工業生產唔靚仔，咁對有世界工廠之稱嘅中國，影響當然最直接。咁啱中國發表的經濟數據又曳，8月消費物價指數(CPI)按年僅升2%，工業出廠價格指數(PPI)按年跌1.2%，令本來走勢較好嘅滬深股市都反覆向下，港股反彈無力，恒生指數全日收報24662點，跌42點；國企指數收報11032點，跌84點，成交金額709億元，至今恒指已連跌五日，累挫655點。
個市跌咗咁多日，似乎見唔到有乜嘢好消息，但由於累積超賣都幾犀利，家似乎就不宜追沽。
內地數據接連出爐都咁疲弱，中央就算唔出手救市，可能個市都會借啲意炒吓呢個憧憬，因為家個個都話已經去到9月，增長情況仲係唔理想，中央再唔出手，恐怕今年增長都幾難達標，加上內地通脹憂慮唔係咁大，如果諗唔到計相信阿爺都想出手。既然個個都咁講，一有風吹草動，炒家郁手夾吓淡倉都唔奇。
炒股仔要識計車費
個市悶悶吓，好多股仔禾雀亂飛，中播控股(471) 計劃收購衛星，公司復牌後即爆上，收造0.24元，狂升1倍，成交金額3.68億元。萬威(167) 主要股東正進行洽售股權的初步磋商，股價延續昨日升勢，收報0.395元，大升16%；森信(731) 勁升37%，收報0.61元，該股收市後公佈不知急升原因。
家好多二、三線股都想趁殼價唔錯賣盤離場，同時亦都有啲人係扮賣殼炒股。小股民睇到自然想分一杯羮，但落注之前最緊要係做小小功課，睇吓隻股係乜料，若然股價只係開車，咁飛身上車就算錯咗，止蝕最多當畀車錢啫，但如果係炒到已經開巷，就真係不宜高追喇，因為炒呢啲股永遠都係莊家在暗，小股民在明，要食大茶飯唔係咁容易㗎！
陸羽仁
金融High Tea 舊文
