降溫局 博懵注
2014年10月10日
港股早前因佔中提前爆發而大跌，但呢兩日隨着局勢降溫表現好番啲。外圍股市上上落落，港股都仲係睇呢場大龍鳳點發展。我同緊密跟進局勢的人士傾過，佢認為佔中拖住落去，大家摩擦熱度減少。街頭抗爭最怕惹起全面叫停自由行同滬港通，甚至流血清場，家出現這些高危局面機會稍為降低。
流血爆鑊機會下降
佔中運動最驚心動魄，係國慶前後兩日，當時無論北京同國際，都唔知局勢會點走，甚至中央會唔會出解放軍，但經過過去幾日形勢發展，包圍禮賓府同政府總部的情況有改善，在咁嘅情況之下，叫停中港合作如滬港通的機會相應都減少。
聽完呢個講法，陸羽仁研判喺最差時間，佔中出現流血收場的機會有一半半，家應該減到三成。有中環茶友就問，咁家係咪應該可以入市買嘢呢？
我嘅意見係政治市變得好快，尤其佔中係大壇嘢，風險唔會咁快消散，家就算入市，都係動用投機資金，即係輸咗或被綁都唔係咁傷的閒錢。如果手頭有呢啲投機子彈，買啲炒吓滬港通消息，最多咪當係博懵注囉。
由於前一晚杜指急彈，港股一開市已高開198點，一度高見23581點，升318點，午後未能突破23550點收市。恒生指數收報23534點，升271點；國企指數收報10483點，升88點，成交只有650億元。
美股跌完又彈，大玩彈床式炒作，我係網誌形容呢啲叫「隱憂式反彈」，係美國經濟有隱憂，無咁怕佢加息，所以反彈。美國好快又到中期選舉，總統奧巴馬雖然無得再連任，但佢都要為所屬的民主黨拉票，佢接受傳媒訪問大晒政績，話自己上任時正值金融危機的高峰期，失業率高達10%，家失業率跌到5.9%，製造業話重回美國投資，財政赤字亦減半，表現絕對唔失禮，記者喺奧巴馬吹完威水史之後，忍唔住講句，話不過選民好似感受唔到復甦喎，搞到奧巴馬都有小小口窒，面露尷尬神色。
美國近期的隱憂是全球經濟增長放慢，勢將影響美國經濟，聯儲局剛公佈會議紀錄都提到呢個憂慮，令市場覺得唔會咁快加息。連帶本地利息敏感股份如地產股都表現靚仔。
市場更加關注係內地經濟。國務院總理李克強在國務院會議上表示，國際和內地經濟下行壓力仍然大，提出六大措施，要保持經濟中高速增長、向中高端水平邁進。
財務股有炒作誘因
李克強表示，關注群眾的需要，有序推進非基本公共服務、資源、環保等價格改革，以及年內推動水利、環保、訊息網絡等領域的一批重大項目。
市場繼續尋找冷門板塊炒作。財務公司香港信貸(1273) 發盈喜，預期截至9月底止中期純利增長介乎50%至100%，主要由於在香港提供物業按揭貸款之利息收入增加所致，股價隨之爆升，相同概念的靄華押業(1319) 都殺上。另外呢啲股仲細細隻，好似香港信貸只有3.9億市值，容易炒賣殼。
有銀行界話，財務公司生意過去一年確係幾好賺，但跟住競爭開始增加，最重要係明年息口有可能上調，平價資金不再，估計好多財務公司都會喺股市搵定資金，應付未來加息期，正因為咁呢類股份有興趣炒上集資抽水，有可能出現投機性炒作。
陸羽仁
金融High Tea 舊文
