中環在線：馬雲話過 經濟學家信唔過
雷鼎鳴拍錯馬屁
親政府學者雷鼎鳴近排語不驚人勢不休，舊年佢估每名港人要為佔中承擔5萬元損失，最近又話每人到訪郊野公園一次嘅成本係2.3萬元，噚日佢無端端又捧內地網民識用網上平台做生意，大讚阿里巴巴創辦人馬雲為網民帶來好多機會雲雲。只可惜，雷教授好似唔知馬雲話過經濟學家信唔過喎，你讚人做乜啫！？
雷鼎鳴噚日出席東亞（023）舉辦嘅經濟研討會，佢話「香港人其實有好多機會，但呢啲機會唔係必然，真係要好好利用……」佢舉例話，今時今日網購嘅增長率驚人，仲改變埋市民嘅消費模式，馬雲嘅網上支付平台就為內地網民帶嚟好多創業同搵真銀嘅機會咁話。
話香港人唔識利用網購
「𠵱家好多內地網民都會透過網上平台搵機會，不過香港又好似冇乜人留意網購……香港網民又有冇利用嚇呢？」佢好似好肉緊咁話，唔明香港後生仔諗緊乜，「唔係要你做第二個馬雲，做到固然好，做唔到嘅，咪用佢個平台賺嚇錢囉！」
哇哇哇，雷鼎鳴真係覺得馬雲好掂咁喎，咁唔知雷教授又有冇用馬雲嘅平台賺嚇錢呢？答案原來係冇嘅，問佢應該點做，佢竟然話「我都唔識答，我係個老餅，早排入咗100蚊落支付寶，未用過1毫子。」睇到呢到，大家心裏面會唔會爆出一兩個語氣較重嘅字呢？
不過冇計喇，雷鼎鳴可能淨係掛住用自己嘅邏輯計數，冇留意近排香港網購嘅發展，「魔童」王維基旗下港視（1137）嘅網購平台上月咪開咗波囉。
雷鼎鳴大讚嘅馬雲果然有料到呀，佢一早就知經濟學家靠唔住，早就勸告企業家唔好只聽經濟學家對未來嘅判斷，仲話「如果你這個時候還去聽經濟學家的預測，你的災難就大了」，一語中的。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
