金手指：再不問價追摩比
■胡翔任主席的摩比發展，有心人不斷儲貨，又係再追的時候。 資料圖片
「啲A50（2823）好似唔使錢咁搶！」噚日，孫柏文同偶像派財演高明到屯門出差，到下晝望嚇啲股價，高明睇到A50飆到差不多14元時忍唔住話。其實睇其他喺大陸做生意嘅公司股價走勢，大家狂炒A50根本唔係睇好大陸經濟及經濟好帶來嘅盈利。因嗰啲冇上海股市概念嘅公司，喺舊年12月國內大升浪中完全冇份。大家炒嘅概念係國家經濟唔好，所以會濫發鈔票，但樓市炒爆咗，故啲人盲追A股。炒貨幣政策，自2009年來，有買貴就冇買錯。喺咁嘅情況，噚日見高明咁講，我就同佢話：「要眾人皆醉……」我都未講完，佢就話：「眾人皆醉要飲高粱！有咁哽得咁哽！」果然係偶像派財演代表。
有心人不斷儲貨
但當你真係想做到眾人皆醉你獨醒，想遠離熱炒板塊，做到千禧年狂炒科網股時代時嘅畢菲特（佢當年買咗做油漆嘅公司），就其實幾容易，因太多股被人拋售套現。例如我極睇好兼我覺得市場仲未覺悟將會有幾勁嘅電訊4G概念，由中移動（941）到我至喜愛做發射塔4G天線嘅摩比（947），都係大平賣。因中移動4G上客超曬標，由最初定嘅2014全年5,000萬戶到舊年11月尾已超7,000萬戶。最重要係同啲國際級電訊老行尊傾，原來好多行內人分析中移動近幾個月嘅數據時，都係覺得佢哋已加大加快嘅4G建設，都仲係嚴重低估末端需求。
若冇我提此事，我絕對信摩比股價可以喺現水平1.5元徘徊，因市值得嗰十億元幾，有影響力嘅分析員會留意，基金想買都唔買得多，但一出業績就即時爆上超過2元一股。因全年盈利一出，市盈率會跌穿10倍，之後仲要來年盈利會增長，到時仲唔狗衝咁搶？睇對上個月盤路，同啲老牌家族成員傾有心人根本喺度儲貨，因基本因素、政策唔阻路，兼最重要係大陸3G極慢，4G先係真無線寬頻，故消費者需求用大陸術語話齋極剛性。眾人皆醉你獨醒？再不問價追摩比啦！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
