魚樂無窮：三個原因中建材值博
■中國建材噚日一度突破8蚊。圖為集團主席宋志平。 資料圖片
A股開門紅喪升近半成，恒指H指卻倒跌收場，掃興程度達十粒星。近期每當股市出現千億成交，往往就係指數見頂之時，故惹來千億魔咒說法。噚日，港股成交「不幸」再度突破千億，係咪意味大市散band？今次唐牛進入樂觀mode，相信故事情節唔會好似TVB劇集咁千篇一律。原因有三個。第一，A股明顯進入瘋牛狀態，要㩒都㩒唔住，港股升幅就算打個五折，都應該未升完。第二，大市近期只係上落市格局，唔存在高位派貨，點解咁大成交？邊個買？自己諗啦！第三，信1月效應！舊年基金輸到仆直，難得而家搵到中資股炒，畀著係你都捉實唔放。食唔食到馬年股市尾糊，真係睇今鋪。
破圓底頸線可見10蚊
今日推介中國建材（3323），同樣有三個原因。第一，資金輪流炒。由金融、券商、內房引發嘅中資股升浪，噚日終於湧埋去資源股，中建材作為水泥股龍頭之一，必買！第二，爆炸力特強。中建材beta值1.23，比同業平均1.1高一截，只比金隅（2009）嘅1.34低，但後者屬半隻內房股，純水泥股計，中建材最具彈力。第三，圖表走勢靚。噚日一度突破8蚊，破圓底頸線指日可待，一旦升穿，下一站直指10蚊，潛在升幅25%，屆時PE只係7倍。
唐牛
https://www.facebook.com/tongcow88
唐牛
魚樂無窮 - 唐牛 舊文
