一周三件：丹楓夠曬可塑性
■丹楓控股將推售紅山半島物業變現，肯定可刺激低殘股價。 互聯網
丹楓控股（271）喺上月尾公佈旗下合營Zeta將推售紅山半島物業，呢壇製作，除咗可以變現龐大現金外，最緊要嘅係，資產唔再齋擺，而係肯鬱，丹楓已起動第一步，日後可塑性可能仲高。
丹楓喺上月尾公佈，集團揸住33%嘅合營Zeta，持有117個大潭紅山半島物業，會喺嚟緊嘅星期五推售。丹楓預計，呢批物業若果能夠全數出售，可以帶嚟11億元變現，單係呢個金額，幾乎相當於丹楓本身嘅總市值，潛在回籠，超級肥仔水。
好消息配合 隨時爆升
諗到嘅係，隨住物業變現，丹楓有機會派送大大件特別甜品。又呢批物業已經擺咗好多年，隨住呢次出售，資產肯鬱反映身價，唔係壞事。又去到上年6月尾，丹楓已經有淨現金3.6億元，連紅山半島潛在變現，集團淨現金將會高達14.6億元。亦會諗到嘅係，就算排除丹楓派送特別甜品可能，若果集團繼續活躍番，超級銀彈就係優勢，有新業務或者變身元素，丹楓股價亦起碼唔再低迷冇波幅。
而除咗上邊提及嘅紅山半島，丹楓同樣透過聯營揸住鴨脷洲「港灣工貿中心」物業（應佔33.6萬平方呎）。呢幢物業，係臨海地段，南區少有。而喺嚟緊日子，地鐵南港島綫通車，物業嘅可塑性，同丹楓一樣，好高，實際價值肯定仲未浮喺資產負債表度。
未計港灣工貿中心重秤，丹楓去到上年6月尾，NAV3.9元，現價（0.88元）得0.22倍PB，吸引到痹。數數手指，又快到紅山半島日子推售日子，丹楓股價潛喺近三年低位，家陣有順風順水嘅消息，肯定刺激殘咗好耐嘅股價。
煲丹楓，當上番2013年頭1.2元高位咁大把，丹楓要升38%，到時，PB都仲係得0.3倍。
錢雋
細價股專家
本欄逢周二、三、五刊出
錢雋
一周三件 - 錢雋 舊文
