中環在線：安永員工登報鬧高層
矛頭直指稅務部主管何淑芬
■安永香港稅務部主管何淑芬，成為「員工指摘」公開信嘅箭靶。 
噚日中環熱話肯定係關於一個由「安永香港稅務部員工」所登嘅公開信，員工不滿安永擢升一位「何小姐」，指呢位何小姐冇建樹之餘，又鍾意玩辦公室政治，安永香港稅務部主管兼合夥人咁啱就叫何淑芬（Tracy），大家即刻對號入座，矛頭直指向佢。
華華噚日打過電話畀Tracy，佢似乎全日都要開會，冇暇直接回應事件。安永公關就回應話，無論現職或已離職員工嘅意見，公司都會重視，將深入了解事件，釋除員工疑慮咁話。
■安永香港稅務部員工」公開信。 指顧住玩辦公室政治
查實呢封公開信嘅內容都幾含糊，由「一班現職及已離職的安永香港稅務部員工」所寫，針對何小姐，但冇寫明係何乜乜，只係話安永自從擢升何小姐後，就帶來翻天覆地嘅變化。
據了解，安永香港稅務部約有四百人，Tracy一早已經係合夥人，大約喺三、四年前升做稅務部主管。眾所周知，會計師行肯定係要交數，尤其係合夥人，如果按照公開信所講，何小姐升職後，只顧玩辦公室政治，冇花時間搵生意，照理佢應該交唔到數，亦都冇理由仲可以坐住呢個主管位。
所以話呢，何小姐有機會係另有其人。話雖如此，Tracy係部門主管，如果真係有同事咁不滿何小姐，去到要花兩萬幾蚊，喺報紙登廣告鬧大件事，Tracy肯定都係責無旁貸。
管理諮詢顧問張慧敏（Son姐）就直斥登報者嘅行為幼稚、鹵莽。佢認為，𠵱家新一代唔識談判，只懂硬踫硬，淨係識講自己想點，冇企喺對方角度諗，最終冇可能達致雙贏方案。作為管理層，喺今次呢件事上，一定唔可以退讓，「如果有人登廣告投訴，就炒咗當事人，咁以後點管理」。況且，如果呢位何小姐交到數，對公司嚟講根本唔係死罪，頂多會被調職。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
