異動空間：散戶三個壞習慣
個市太悶熄咗機，不如講嚇投資心理。魏力在fb答咗接近三年問題，總結散戶炒股習慣有三個，不妨睇嚇自己中咗幾多樣。一、自命身手不凡，最愛接飛刀。股票由高位跌咗四、五成，或單日狂插三成，總有人問「撈唔撈得？」減價貨係好吸引，但一隻股票洗倉總有原因，可能老闆走佬、間廠燒咗、ICAC做緊嘢，唔知的話咪亂掂。股神話齋，投資第一戒條係不讓自己蝕錢，第二戒條係不要忘記第一戒條。
二、升就快閃跌就賴死。贏粒糖輸間廠，係人都知冇so，但每當推介股票升咗5%，就有人問「幾時食得？目標幾多？」跌到阿媽唔認得要止蝕時，就會反問「可以坐多陣等反彈嗎？」炒股冇人想輸，但輸要認，止蝕冇得等。
三、只炒細價股，刀仔鋸大樹。五毫子股票跳一格2%，諗住好易賺，但股價可升可跌，跌一格都係2%，機會均等。長建（1038）揸一年回報有四成，隨時多過閣下全年炒出炒入。
悶市又炒番殼股，台和商事（1037）賣盤聲漸近，市值5.6億元，剛創一年新高，似層層！買少少博個驚喜。
魏力
http://www.facebook.com/2012jason
魏力
異動空間 - 魏力 舊文
