未爆煲 先出位
2015年02月12日
樓市大戶湯文亮今個星期發表高論，預言細價樓在三個月內爆煲。呢類驚人論調最易哄傳，加上好多公屋王、居屋王新高價誕生，令到政府再出辣招的聲音甚囂塵上，地產股昨日都軟咗一軟。
日歐爭相放水，加上內地開始鬆咗銀根，令樓價屢創新高，不過，從地產股無法創出新高，可見好多聰明資金，始終都對本地物業市場有戒心。
益咗財仔股炒上
樓市大戶警告話細價樓三個月爆煲，佢嘅論據係有物業搞到四按，證明買家實力好薄弱，一有風吹草動就會冧。呢番話一出，反應最強烈的不是地產商，而係做財仔放數的公司，好多人紛紛反駁，話佢誇大情況，又強調過去收樓數目其實好少。唔知係唔係知道自己言論有阻人搵食之嫌，樓市大戶湯文亮昨日好似低調晒，無再出來搞新預測。
當大家講到做財仔咁多生意，去年底上市，主力做二、三按嘅環球信貸(1669) 一日就爆上兩成。佢係去年底上市，掛牌初期表現麻麻，一度下插到1.22元，今年開始一路爆上，市值由上市時的5、6億元，狂升到18億元，睇嚟做財仔都無印股咁易搵錢啦！
有中環茶客笑言，做得預言家就要大膽，樓市大戶就係靠咁出咗位。至於佢講三個月爆煲中唔中都唔緊要，因為三個月後就算唔中，可能無乜人會記得佢講過乜。
對於住宅價錢，陸羽仁當然覺得貴到離譜！不過佢幾時跌就真係無謂估，因為大部份人買樓，都係升的時候先想買，跌的時候唔想買，所以升開有條路，唔係咁易估到佢幾時轉角！從投資同保值角度，最重要就係睇風險同回報係咪成比例啫。
樓價短期無得估，但供應就大話怕計數，有研究粗略估算，今年將有八十三個新盤可供推售，涉逾三萬三千七百多伙，創十年新高紀錄。這批新樓共有七個項目的規模超過一千伙，並以新界區供應最多，共涉四十個項目，單位總數共二萬一千五百六十三伙，佔今年整體供應約六成四。
地產商中，新地(016) 為推盤最多的發展商，連同年初推售的東環一期項目，集團今年共有十一個新盤可供發售，涉一萬一千三百九十七伙，如果要全數賣清，新地樓神真係賣到手軟先得。
匯控攻防戰未完
樓市之外，市場話題離不開匯控(005) 爆70元關攻防戰。一輪肉搏後，大笨象收報70.25元，挫1.6元或2.2%，雖然暫時頂得住防線，不過西方監管機構似乎對佢仲未收手，呢場埋身惡鬥，相信無咁快落幕。
匯控同中移動(941) 腳軟下，單係兩股已質低恒指95點。雖然內地股市微升報收，恒指仍低收報24315點，跌213點；國企指數收報11651點，跌44點，成交金額647億元。
今日東亞銀行(023) 將公佈全年業績，是首間公佈成績表的銀行，同時拉開藍籌業績期序幕。市場普遍預期，東亞近年積極開拓內地業務，但在內地經濟放慢下，將拖累盈利表現。外界估計去年純利介乎58.61億至66.95億元，由按年減少6.7%，至增長6.6%。東亞股價在公佈業績前夕偏軟，收市報32.2元，跌0.1元。
收市後，地政總署公佈，九龍筆架山住宅用地，以23.9億元批予嘉里建設(683) 。地皮收到20份標書，市場對地皮估值為10.47億至15.1億元，今次作價遠超預期，每呎去到兩萬元，大戶話樓價貴，點知一樣有人高價追地。
陸羽仁
金融High Tea 舊文
