酒店難搞
2015/04/08 09:02:23
網誌分類: 經濟
阿爺股市創高，美國股市腳軟。週三美股受歐股造好及利好經濟推動，早段延續上日升勢造好，杜指一度升超過100點，但隨著美企季度業績報告潮展開，投資者在最後一小時轉趨謹慎，美股尾段急回，收市嘔凸，微跌收場。
杜指收市跌5點，報17875點；標普500指數跌4點，收報2076點；納指跌7點至4910點。
美國3月非農就業職位增加只有12.6萬個，只係市場預期的一半，為2013年12月以來最小增幅。失業率則維持5.5%，與預期一樣。就業數據差過預期咁多，令到投資對聯儲局提早加息的預期大幅降溫，美國債息回落，黃金油價反彈，美股在復活節假後復活，杜指周一亦反彈120點。市場普遍認為聯儲局最快都要在今年第四季以後，甚至明年才可能會加息，令到全球投資氣氛為之一熱，升市擴散至亞洲，又傳到歐洲，歐洲股市大漲1.6%，逼近歷史收市高位，其中德國股市升1.3%，法國股市升1.5%，英國股市更漲近2%！
走一個圈輪番到美股時，昨日早段都在高位橫行，到最後一小時才開始變臉。走高的原因除了外圍股市造好帶動以外，出爐的經濟數據好番啲，減輕了投資者對美國經濟疲弱的憂慮亦係其中原因。我之前提過，美國經濟近排可以講係瓣瓣唔掂，惟一有點睇頭的只有就業數據，但上週五公佈的就業市場數據實在太嚇人，自然令到市場倒抽一口涼氣，擔心美國經濟復甦已經玩完。
勞動市場狀況唔得，除了受到美國惡劣天氣影響以外，主要原因還是美元匯價持續走強所致。貝萊德 (BlackRock) 執行長Larry Fink指出，許多規模及影響力最大的美企盈利大量仰賴出口，美元持續強勢，已經令到這些企業老闆的信心受挫，繼而放慢投資決定，減少招聘人手。其實，上週三公佈的ADP私營部問職位增加數字好嚇人，市場已經預咗非農就業數字唔會靚仔，但仍叫人跌眼鏡的是增長數字差得咁緊要。Larry Fink警告，美元繼續走強的話，將導致美國經濟成長減速。
但昨日美國勞工部公佈的2月JOLTS職位空缺數從1月的497萬增至513萬，創14年新高。另外，美國2月消費信貸增長5.6%，係去年10月以來最快。其中汽車貸款與學生貸款等非循環信貸，增幅由上月的5.8%大幅高到9.4%，創2013年2月份以來新高。經濟有點起色，美元又弱，令紐約5月期油大升3.5%至每桶53.98美元，市場的投資氣氛提高，能源股又多番支撐。
至於美股衰收尾，相信係投資者態度轉趨謹慎所致。美企季度業績公佈潮將於收市後由美鋁開始拉開序幕，市場預期美企盈利在過去一季會因為強美元及低油價的衝擊，成績表會幾難睇，投資者當然唔敢咁博。另外，聯儲局今日將會公開對上一次的議息會議紀要。美國通脹低企，就業市場有轉弱的跡象，投資者自不然希望透過聯儲局會議記錄，睇睇當局會根據什麼準則去決定加息時間表。
雖然港股而家唔太跟美股，但美國利息走勢仍左右香港經濟，特別係地產股走勢，若然真係推遲加息，樓市又會繼續旺多半年。香港本地經濟真係無樣好，只有地產撐吓。
3月旅客回落的情況令人擔心，手上揸有酒店股，想借佢來收息，真係早走早著，你睇復活清明的大陸客咁冷清，房價大跌，酒店業寒冬來了，未來還有大量酒店陸續落成，試想普通5星酒店由收2000、3000元一晚，跌番去1000元有交易，呢條數都好傷架，或者旅客跌一輪會有啲反彈，但我擔心香港酒店業好日子已過。好似隻富豪國際(0078)
，現價市盈率17.8倍，息率3厘，現價4.8元，收末期息都收0.12元，有2.5厘息，本來好好，但面對酒店業前景係咁，佢股價又唔係在低位，真係見好要收啦。 陸羽仁
回應(6) 我想回應
陸羽仁 BLOG 舊文
