【文亮言】如何做一個合資格的物業投資者（湯文亮）
有後輩問我如何做一個物業投資者，是不是跟隨那些前輩口訣「等忍狠」「快狠準」，再加上「留守走」等，靈活運用，假以時日，就可以成為一個出色物業投資者。我見那位後輩眉清目秀，口齒伶俐，如果得到一些指點，他日一定可以成為一位出色物業投資者，而出色的
意思就是唔好乞人憎，並不是賺很多錢的意思；是否能夠賺到很多錢，有時都要信命運。風水，就算賺大錢，富甲一方，但乞人憎，一樣不是一位出色物業投資者。後輩問我係唔係，我對佢講，我唔使答你，你上網站睇嚇回應， 就知道我不單只不是一位出色物業投資者，連合資格也談不上，而我教你的功夫，是入門第一步，如果連這一步也做唔到，唔好投資物業，走去股票市場搵食算了。
一向以來，一般人對物業投資者的印象不大好，不但冠以炒家，地產霸權等惡名，有機會的話，就會要求政府出招打壓。不過，一般人又非常希望做物業投資者，在過去幾年，那些無端端將自住物業賣走的人，他們其實也是炒家，只不過是炒樓價下跌，而樓市又沒有沽空制度，很多人包括一些知名評論員，他們唯有身體力行，將自住物業賣走。老實說，他們雖然輸錢，但卻是符合做炒家的條件，起碼他們能夠做到入門的第一步。我知道那些人當時價到收票賣樓，從不反價，因為反價，是令人反感行為，投資者決不為之，在我的「逢三退一」中，退走的物業一定是手上最劣，潛力已被耗盡的物業，開價幾多都可以，但一定唔可以反價，政府唔俾地產商唧牙膏式賣樓，就是唔俾地產商反價。
如果唔打算賣樓，就唔好攞出嚟賣，以為可以試價，玩那些買家，到價又反，到價又反，令人反感而他們自己又不知道。那些人平時經常說最憎物業炒家，卻又做出連物業炒家都不屑做的行為，唔想賣就唔好攞出嚟賣，千祈唔好開咗價，對方俾到價又唔賣，以為可以玩那些買家。其實，那些物業代理心中有數，知道那些業主根本唔想賣樓，就介紹個客俾佢哋玩，反得兩次價，物業代理就會介紹個客買另外一個物業，會加上一句話呢個業主唔會反價，咁就完成一單交易。倘若他日樓價下跌，那些物業代理就會對反價的業主說，抵你死，個客俾到咁好都唔賣，現在週街都是賣盤，賣樓賣到俾人咒，這又何苦。其實，現在上車的人已經好辛苦，如果唔打算賣樓，唔好玩佢哋，當積陰德，會有好回報。
文亮言 - 湯文亮 舊文
