一周三件：一拖值得翻兜
■第一拖拉機的股價已回調至北水最狠勁加倉成本價水位，值得翻兜。 互聯網
港股通裏面，北水揸到應佔發行股數權益最多，兼去到排頭位咁巴閉嘅股份，有一隻，就係一拖（038）。一拖呢轉調整，跌到北水最瘋狂加倉成本價，有得諗。
北水加倉掃貨狠勁
港交所（388）新鮮熱辣中
央結算紀錄，去到本周一，北水喺一拖H股應佔權益，仍然達到14.5%，或5,817萬股，北水買一拖，買到脫穎而出！仲未止，粗略計數，一拖上個月2、8、9同10日，股價衝得最勁呢四日，單日平均價係6蚊到最高8.2元。又北水佔一拖H股權益，亦由3月30日的6.7%，一個double，跳到4月10日的13.83%。睇到北水加倉係越高越掃得狠！一拖現價（6.59元），已經跌到同北水最狠勁加倉成本價水位。
又一拖H股股價，比起本身A股（滬601038）股價約18.7港元，大折讓65%，喺88隻有對應A股上市嘅H股裏面，一拖嘅AH股折讓，係排第六，炒AH折讓，一拖絕對有得諗。再講，一拖家陣得1.17倍PB，本身A股講緊2.94倍PB、祖國行家吉峰農機（深300022）高達57.5倍、新研股份（深300159）12倍。同樣主打拖拉機嘅江淮（深000816），PB閒閒哋都講緊5倍，一拖PB，起碼折讓咗76%！
一拖對口單位係中國機械工業集團，啱啱今年頭祖國報載，中國機械由今年到2017年時，證券化目標要提升30%，意味住有高達700億銀人仔，折約875億港元資產，係等緊證券化！一拖作為中國機械一員，嚟緊日子，係有整合或者俾湊大憧憬，而家陣集團H股市值，講緊得26億元。
呢轉翻兜一拖當翻半番到9.9元計，PB都係得1.7倍，未有耐追到行家，H股市值都係得50億元咁大把。
錢雋
細價股專家
本欄逢周二、三、五刊出
錢雋
一周三件 - 錢雋 舊文
