A牛缺氣
2015年05月06日
踏入五窮月，港股連跌兩日，大市因為A股急挫，搞到下午跌勢轉急，調整都來得相當全面。A股由2月回調時的低位3049點一直殺上，直衝高位4572點，升咗1523點基本上無停過，出現近50%的驚人升幅，到昨日才顯著回調，跌多啲可能健康啲，無貨者亦想佢回深啲，
一來可以打吓底，二來有機會低位入番啲貨。
市跌搵吓壞消息，當中最大劑係昨日是大量新股認購日，市場預計凍結資金將達2.5至3萬億之間，出現這樣巨大的抽血壓力，自然令處於高位的A股腳軟回調。加上人民銀行再停逆回購放水操作，令市場失望；又有報道稱內地多間券商上調融資和融證的保證金比例。種種不利因素加埋搞到A股大瀉，滬深兩市重創逾4%，上證綜指回到4298點，拖累港股曾插逾500點，收市跌368點，收在27755點。睇番A股呢次調整，狂牛明顯已經唔夠氣，衝到攰晒要唞唞。
阿爺放股降溫奏效
4月初時，阿爺明知將會公佈的首季經濟數據唔靚仔，喺壞消息曝光前不斷推出措施，藉以沖淡負面氣氛，呢招結果相當成功，減低咗經濟放緩對市場的影響，之後其實已經見到阿爺開始縮手，無乜利好消息出台，市場傳言央企重組合併，甚至話有中國版量寬，結果只聞樓梯響，暫時仲未係堅料，可見阿爺頂完一輪後，決定暫時唔做嘢，等個市自由浮動吓。點知A股隻牛牛真係有氣有力，就算無阿爺從旁打鞭，佢都衝完一關又一關，過完4000點唔肯回，直衝到近4600點。上次阿爺出招降溫俾基金鬧，今次無大動作做嘢，只係大力放新股出來，利用供求拉低個市，到昨天終於見效。
港股無內地咁牛，去到4月下旬，見到入市資金已經減少，領頭的大股好似一路一帶、保險股都逐一唞氣。今個星期，港股板塊唞氣仲明顯，資金轉移炒落後，去到香港地產股都炒上，個市基本上已經走完一圈，應該升嘅都升得八八九九，咁啱內地又回吐，咁就唔單止指數調整，各類股份都全面回調。
港股五窮暫時應吓節，後市點樣要睇內地同資金流向。陸羽仁同好多人傾，內地經濟仲係未得，好多地方依然增長動力不足，估計第二季經濟仲係要打底。喺咁環境下，陸羽仁覺得阿爺會繼續出招托住個市，領導人依家無動作，只係明知經濟未得，未來仲有需要推出刺激措施，暫時留番子彈等有需要時用。依家中資股普遍估值仲係唔算貴，後市應該未至全面爆煲。不過，大市向好基調雖然未改，但睇番上證綜指由低位大升1523點，升幅實在太快太急，好多股民借孖展炒股，風險意識唔夠，現在一旦回吐，不排除個市會再插多陣，若係咁意下調升幅33%，都要跌到4069點，如果手頭有貨，依家就未有必要咁急加倉啦。
昨日國企跌得多過恒指，恒指跌1.3%，國指跌2.6%，但未跟足上證的4.1%跌幅，主要因為之前無內地升得咁狼所致。內銀股為跌市主兇，建行(939) 、工行(1398) 及中行(3988) 合力質低恒指124點。交行(3328) 挫逾4%，造7.73元，是包尾藍籌。周初炒得熱鬧的本地券商股沽壓都重，結好(064) 插9%，耀才(1428) 跌10.5%，南華金融(619) 更大跌12%。
匯控首季報佳音
中資股唔得，收市後匯豐控股(005) 公佈首季業績，除稅前利潤按年增加4%，比市場估計好，倫敦股價先跌後回升，比本港收市價高2%。
新華社報道，內地有12間企業因涉嫌欺詐和賄賂，被列入世界銀行「黑名單」。「黑名單」中的企業在一定時期內，將被禁止承接世界銀行資助的項目。「黑名單」中包括大慶油田路橋工程、中國交通建設、中國地質工程集團、中國建築、天津阿爾斯通、中國第一冶金、浙江浙大網新、中科生命科技等多間公司，看來中央要走出去，牽頭搞亞洲基礎投資銀行，西方國家就唔係咁想，呢次世銀出資抵制中國企業，可能只係第一波。
陸羽仁
金融High Tea 舊文
