一周三件 - 錢雋 2015年6月12日
一周三件：吼中電新能源
■若中電新能源未來獲納入中港通可買賣股份，唔難成為北水至愛之一。 資料圖片
「中國電力投資集團」同「國家核電技術」呢兩大巨頭，宣佈合併，組成巨無霸級數嘅電力企業。中電投喺祖國嘅嫡系股份，股價放紙鳶，但香港上市嫡系中電新能源（735），未鬱過，PE、PB屬系內最平，有得諗！
份屬中電投嘅祖國股份，有吉林電力（深000875）、上海電力（滬600021）同中電遠達（滬600292）。由上邊所講兩大巨頭醞釀到正式公佈合併消息，市場憧憬嫡系股份同樣有改組注資，吉電短短十二個交易日，升咗75%，市值上300億港元嘅中電遠達，亦都身輕如燕，同期升咗17%，但中電新能源係冇升過！
再睇硬數據，場內專業評估，中電新能源今、明兩年EPS5.1仙同7.8仙，增長70%同53%，兩年預測PE由家陣24倍，跌到得14倍同9.2倍。上邊吉電無PE預測、上海電力明年41倍，中電遠達更加高達69倍，中電新能源平絕同系！中電新能源0.88倍PB，吉電6.6倍、中電遠達亦講緊5倍，講PB，中電新能源亦係平霸！
中電新能源終極對口，係國務院國資委，場內同樣以國務院做終極牌頭嘅新能源行家，有光大國際（257）。光大國際明年預測19倍PE，市值近600億元，亦講緊係中電新能源85億元嘅7倍，中電新能源奀到呢！
前兩期主打重慶銀行時（1963）提過，場內有呼聲建議，喺中港通擴容時，納入恒指小型指數成份股，中電新能源亦係成份股成員。諗到係，以中電新能源背景，北水認受性應該好高，嚟緊日子，若果獲納入中港通可買賣股份，唔難成為北水至愛之一。
咪扯咁遠，買落後，買平靚正數據，當中電新能源現價（0.72元）翻半番到1.08元計數，明年預測14倍PE，完全係未追到上邊任何一隻電力股！
錢雋
細價股專家
本欄逢周一、三、五刊出
錢雋
一周三件 - 錢雋 舊文
