點石成金 - 石鏡泉 2015年6月12日
抄也要抄得精明
有謂天下文章一大抄，原因簡單，太陽之下無新事，每日能有幾多新？最抄得多的是技術走勢，甚麼的雙頂、雙底，都是前人發明的，我們也不是依書照抄？
問題是有人抄了個真雙頂跟沽便贏，有人認為是雙頂，但之後有三頂、四頂，跟沽便輸。可見抄書都要抄得對，才有益街坊。講個抄書抄得贏的故事。
昨日筆者去農場耕田，冇睇市。突然有個做醫生的朋友打電話來話要請我吃飯，我愕然。他謂：今日執咗啲，多謝你。我問何解，他續謂。
信內地分析 高位勢危
這幾天見你抄內分析家講A股的文章，都講位高勢危，宜減磅，他們是內地打滾是專家，外資分析家隔山打牛。是靠估家我信內地人語，加上在今周見你個三個港股圖，我就出曬貨。
我打斷之，咁都冇得賺吖。
他謂，我睇你昨早（6月9日）在《經濟通》的文章，謂恒指跌穿270可見266、260、250、245。而昨日收市恒指就跌穿270，我就有啲衝動去沽期指，但已近收市，不敢沽。到今午（指6月10日）聽到青衣城有疑似沙士，消息一出，我就去沽期指，原先想揸過夜，但考慮到是疑似啫，加上我是醫生，知道醫務衞生處已講明，一有曾旅南韓的發燒者，便要上報，所以穿保護衣來處理，不一定是真沙士，所以就不敢揸過夜，但求見到如你圖所示的補完裂口便平倉，執到啲囉。
我當時在火車上，冇得沽，只好恭喜佢，順問，怎知不是真沙士，他謂，如果是真沙士，點會得一兩個穿保護衣者，一定會成隊兵來啦。他又補充，他又真擔心沙士會打到嚟，他謂：是陰性反應不一定不代表你不帶菌，你強壯，不發病，跟你接觸過的人，如底子不好，是可以中招的。
他又謂，今年暑假本計劃和家人到南韓滑雪，今時就取消，連改去北海道也不制，日韓接觸密，領嘢邊個賠，有謂君子不立危牆下，更何況我呢個小人。
抄也要抄足真材實料
執唔到期指，便執餐飯，我要求搵間米芝蓮，不食日韓放題，我並問之，我今時成日抄國內文，你點睇。
他謂，你要抄，就要全文抄，不要抄兩句，抄一兩句，即是只抄，升、跌。冇原因，阿豬阿狗都可去估，重點是要看人家分析，不是結論，你再重寫都可以斷章取義，無謂累人，我知你一日睇幾十篇文，先至抄一兩篇，我都嫌得你抄得少，阿溫（我們一個朋友）每月都畀成萬銀人，叫人家剪國內文章予他，就是避免香港傳媒將人家文章過濾，成日加入自己意見，又或抄人家意見當自己意見，就最累人累物，今時好的意見不多，不好的意見則隨地有，我要的是FACTS和專家意見，你咪亂cut。
我這位醫生朋友能於周三發點沙士財，是因為他有時間跟貼市（他周三下午休診），又看過我抄來的文章，之前清了貨，有可以沽的心態，再加上有個沙士疑雲，及時掌握，又知道補完裂口便彈，又不大貪，如果貪坐過夜，就可能會蝕渣米。
所以不要見人家賺錢又想抄，都要看自己識唔識得抄，和點抄。正是各有前因莫羨人，有些嘢是畀你抄你都會抄錯的。
點石成金 - 石鏡泉 舊文
