中環在線：兵變代理加盟Q房網打對台
美聯創辦人叫美聯睇路
■Q房網香港話事人陳坤興（中）同icon小Q及模特兒合照。 李展翹攝
美聯（1200）前執行董事陳坤興帶住被美聯主席黃建業怒炒嘅「六壯士」過檔內地地產代理公司Q房網，呢間公司噚日喺灣仔君悅酒店搞咗場開業酒會，宣佈正式登陸香港
市場，代理界又再起風雲。
酒會星光熠熠，除咗發展商嘅賣樓高層幾乎到齊，仲有代理界「老行尊」美聯創辦人馮銳森罕有高調現身撐場，馮銳森仲叫中原、美聯兩大代理提防呢位新對手入場㖭呀。
■美聯創辦人馮銳森現身撐Q房網。 陳家雄攝 強調無持Q房網股份
馮銳森同黃建業原本係沙煲兄弟，1973年一齊成立美聯，公司上市後，黃建業要一統天下，馮銳森冇癮離開，兩人從此不相往來。馮氏之後離開地產界超過廿年，住山頂、炒股票，得閒遊埠嘆世界，原本深居簡出，但舊年美聯兵變，佢老人家睇唔過眼，重出江湖，為抗衡黃建業嘅APEX基金做顧問。
噚日Q房網開業，睇住被黃建業怒炒嘅前美聯員工搵到新東家，馮銳森都有到場祝賀。佢話以往兩大代理主導市場，𠵱家有新嘅代理用新嘅模式同傭金制度，減少管理層分傭，激勵員工，相信會為市場帶來衝擊。
佢又形容呢場係長期戰，如果Q房網企穩陣腳，對兩大代理好大影響，尤其Q房網有內地背景同網絡。
佢憶述，上世紀90年代，當時身為美聯副主席，佢將香港代理運作模式帶返內地，時至今日，內地代理演變咗一套新模式，今日竟然又拎返來香港。咁睇好Q房網，唔通佢有股份？佢斷然回應：「冇，我係客人。今日所講，全部代表我自己。」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
