魚樂無窮：大跌市撈底如何揀股
■e-Kong能夠逆市破頂，原來有猛人楊俊偉入局。 互聯網
A股跌到四腳朝天，一度重插8.6%，須知大陸股市跌一成要停板，可見跌勢非常全面。大摩同日踩多腳，指A股已見頂，不宜撈底。月初MSCI指數未有納入A股，有人話因為配套不足，人民幣未自由兌換；貼地啲
諗，當時滬綜指5000點，一年升超過一倍，若大摩開綠燈，追蹤指數嘅基金焗住接貴貨，不合情理。如今摩笛高奏，又係咪為MSCI將來納入A股部署呢？值得深思。
變幻原是永恒，諗住交稿之際，人行突然減息兼降準，放水打孖上，救市指數達十粒星，今日中港股市報復性反彈可期。
原有主題不變，講大跌市下揀乜股撈底。「梗係揀一直唔肯回調嘅心儀股，如A股ETF、內銀、內險股啦。」其實仲有另一個選擇——逆市奇葩。點解咁講？全世界都跌你唔跌，證明買盤比沽盤強，絕對值得尊重，更預示有動作跟尾。
本欄愛股e-Kong（524）逆市破頂，原來猛人楊俊偉入局，睇佢揸fit嘅東南國際（726）今年累升2.5倍，e-Kong有運行了。童裝股米格國際（1247）同樣企硬，睇睇通告，大股東丁培基減持9.1%股份，每股作價1.03元，持股量減至29.6%，控股權不再，又一疑似賣殼case。米格市盈率5倍，息率3.5厘，市值9億，現價入場較幕後人士僅貴一成，值得跟進！
唐牛
https://www.facebook.com/tongcow88
唐牛
魚樂無窮 - 唐牛 舊文
