央媽重手護牛
2015年06月29日
上周五內地股市繼續大插，二千隻股份跌停板，上證綜指大跌7.4%收場，收4192點，穿埋早前低位4256點，向下尋底之勢，好得人驚。
創業板指數更直插無水花，大跌8.9%，收2920點，比6月5日的高位4037點，已經唔見咗28%！ 而上證指數
都比高位跌咗19%。內地調整調到咁，已經燶燶哋有啲災味，阿爺見到咁情況，周六急急出手護航，宣佈定向降準及減息0.25厘兩招一齊出，確保可以護住牛氣，唔會跌穿埋4000點大關，跌出個禍來。
縮手惹禍 急急補鑊
上周五港股受內地暴跌影響，恒指收跌481點，其實在3點內地收市後，恒指已有反彈，在3點前恒指最低跌過622點，到A股收場後來個小V反彈，收復141點，以跌481點收場，跌幅1.8%，國指就跌2.8%，遠比內地的7.4%跌幅少，反映有人已經開始入市撈底，期望上周六、日阿爺有動作，先行平淡倉或造好博反彈。阿爺出招後，呢批人依家已經叫緊胡，今日開市就知食唔食得出？
睇番呢次央媽重手救市，政策上有點急轉彎味道。內地在上周二端午節過後，上證綜指插低見4256點，當日單日轉向彈升，本來以為內地已經見咗底，但到上周四五又連續兩日狂插。內地個市跌乜，有人話「志玲姐惹禍」，不是台灣的林志玲，而是中國證監會中層官員李志玲被拉，因為她的愛人違規炒股。但我覺得一個事件整唔跌成個市；又有人話係阿爺規管「融券」(即孖展借貸)所致，但我覺得阿爺日日都在管緊，唔至於有咁大殺傷力。
我估真正病因係市場見阿爺6月無出手降準，估計阿爺的放水政策由「大水漫灌式」的降存款準備金和減息，轉為「細水長流式」的定向微調。上星期央行用逆回購操作，意味着6月末降準可能性下降。睇番自去年11月減息以來，人民銀行每個月不是減息就是降準，維持每月出招的勢態，但個市4月個市發狂向上，上證綜指升穿4000點後無回頭，直撲5000點，創出5178點的高位。阿爺除了大量放新股上市，或者審查兩融之外，都無大動作打壓個市。股市如壞孩子，無人打佢佢就唔聽話，升得好急，上證綜指都唔算誇，好多創業板股升到過百倍市盈率，有啲泡沫味，令人有啲擔心。
聞到災味 孖招齊來
本來，市場預計6月還有一次降準，結果情況出現轉變，到月尾還不見出現，反而見中央重啟逆回購，這種細規模放水措施，就擔心阿爺轉了放水政策。雖然話近半年結，但中國的資金面較為寬鬆，6月25日當天，隔夜的上海同業拆息Shibor利率為1.357%，7天的為2.884%，14天的為3.6%，一個月的為3.571%。短期利率維持在較低水準，但是近半年結，從月中開始，14天期限的Shibor利率就開始上漲，6月19日突破了3%，之後並無回落，央行的逆回購放水，正好解決跨過6月底的資金需求。這種變化令市場開始擔心中央不會大規模放水。
但內地市就係咁，一係唔跌，一跌就好誇張，周五單日上海股市急挫7，令到央媽開始驚青，本來快奔的狂牛，會不會因為缺水，唔單止變成慢牛，而且仲會變成唔會郁的死牛？於是迅速調整貨幣政策，定向降準和減息打孖一齊來。
我就認為阿爺減慢放水的速度，本來想釋出一個訊息，叫股市不要炒得太癲，阿爺想見一隻慢牛，不是快牛。阿爺想讓內地股市調整得深少少，反而健康咗。不過，股市由5178點高位係咁連日猛插，累積差不多跌了兩成，根據傳統股市定義，已經有點股災的味道，仲好似止唔到血咁，官員的想法立即就變啦。
阿爺呵番 市況回穩
嚴格而言，上周四、五內地股市連番暴跌，令人擔心A股是否已經爆泡，睇數字又未致如此。內地證券時報資料中心對以滬深300代表的股份統計發現，目前滬深300指數成份股整體市盈率為16倍，對比滬指當年高峰6124點時水準，當時的滬深300指數成份股市盈率高達42.08倍，即是話現時估值只是歷史高位的38%，唔算太得人驚。
不過，如果個信心全失，要醫番好佢就唔容易，正如陸羽仁成日講，中央唔係想個市大跌，而係唔想佢升得太快，如果只有升市同跌市任佢揀，咁現階段佢都仲係要揀升市，所以當個市聞到災味，央媽就唔敢冒險，急急出來呵住雙牛牛先。
如果按照最理想的情況操作，中央最好係今個月只係逆回購乜都唔做，個市回番打打底，到七月份就有條件降準，然後八月份再減息，等股市慢慢升番。但市場從來唔會一步一步行，你想佢慢跌，佢一係就照升；一係就急跌。內地個市先升後急跌，話咗畀阿爺聽騎牛唔係咁容易。依家佢將七、八月份分開來放的水頭，一次過谷晒入巿，證明官員不容有失的心態。
對於央媽重手救牛的效果，有內地股民講笑話，形容：明明一句話就能哄回來的，偏要到分手了，才拿出0.25克拉的小鑽戒來哄，這還回得去嗎？
內地股民因為中央延緩放水，搞到神經緊張，不少借孖展炒股的股民都快要或甚至已被逼斬倉，心中不免有氣，覺得官員做法過份，所以網上才有主責官員放工被股民窮追的惡搞片段又再次上載。然而，陸羽仁覺得股民都要現實些，內地牛市被視作係一隻「政策牛」，大家都是看着政府的指揮棒做出入市參考，這次滬深股市大插，正正是因為央行唔肯如期放水造成，現在政策來個急轉彎掉頭回升，牛市的底氣又未被嚴重破壞，正如女方根本個心係心儀男方，只因對方情人節無送花喊分手，現在人家識做生日送完花兼預備埋燭光晚餐，女方如果死都唔肯原諒，咁就成晚無節，搞得不好仲俾其他人撬牆腳，咁咪好蝕底？所以我估個市喺阿爺大力扭軚後，情況基本上已經穩定下來，如果今日開市唔係係升得咁多，又或者本身錢多貨少，都可以考慮睇位增持番。
想要買貨 棄A取H
至於落手目標係乜，我認為買H股好過買A股，恒生AH差價指數124.53點，即A股較H股有24.5%溢價，雖然比6月頭A股大升時的36%溢價為少，無論如何仍有明顯折讓，而且5、6月係傳統港股淡季，淡季過後，港股有較佳表現，整體前景而言，睇好H股下半年的前景。
陸羽仁
金融High Tea 舊文
