一周三件：第一上海啱炒
■勞元一任主席的第一上海，受惠港股日均成交大增，前景看俏。 資料圖片
第一上海（227）旗下中國資本（170），食住呢潮資產大增值，好肥仔，第一上海有母憑子貴嘅concept，加埋市旺，喺嚟緊半年度成績單，又有得炒盈喜，要睇實。第一上海揸中國資本32.8%，係集
團主要聯營。後邊中國資本啱啱公佈無耐，話有意以唔低過9.53元人仔，出售山東魯抗醫藥（滬600789）約4,444萬股權益，估計獲毛利3.34億銀人仔。魯抗醫藥就算經歷呢潮A股調整，現價仲企喺13.18元人仔，中國資本應佔權益等值7.3億港銀。
交投增 博有盈喜
又就算中國資本最後按計劃，落實以大折讓價出售山東魯抗呢撼貨，食住上年以嚟超級牛，中國資本以至主要股東第一上海嘅獲利（應佔毛利1.37億港銀），都好肥仔。再講，雖則港股呢期調整，但睇番上半年，中港股市整體係炒到飛起，而港股今年上半年日均成交額，去到1,240億元，比起上年同期629億元，幾乎翻咗一番。去到第二季，港股日均成交額，更加上到1,600億元，靚仔到痹。券商包括第一上海在內，就快派嘅半年成績單，係有得博盈喜！
又第一上海短短兩個月，調整咗30%，到上年底PB，跌到得0.83倍，呢個PB水位，仲係未計嚟自中國資本今年上半年嘅NAV增值。
場內有祖國背景，而主打香江陣營嘅，有信達國際（111），往績1.4倍PB、申萬宏源（218，前稱申銀萬國）3.4倍PB、海通國際（665）2.5倍PB。港資英皇證券（717）1.8倍PB、金利豐（1031）2.5倍。第一上海PB係平咗一大截。
個市橫風橫雨，穩陣啲，睇實第一上海250日線1.7元兜底，當上番1倍PB計，係要升35%，到2.3元，都未有耐追到上邊所有行家嘅PB水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文
