一場惡鬥
2015/07/03 09:19:50
網誌分類: 經濟
美股等緊希臘周日公投風平浪靜，內地股市繼續大上大落。阿爺週三使出3招救市，但仍然止唔到咳，上證綜指朝早在4000點大關爭持，但下午2點被人狂掟頂唔住，一度掉頭重挫6.4%！連3800點都頂唔住！嚇死唔少人。
但2點半後護國軍
出場，大力狂掃兩桶油、四大內銀這些權重股，半小時一場大戰，你睇中石油A股大升8.8%就知，一隻2.1萬億市值的巨股，可以在半小時內咁樣彈法，即係30分鐘升咗1848億市值，你話幾誇，而且唔止一隻，有好幾隻巨股都係咁。
結果挾番出一個小V型反彈，上證跌幅由6.4%收窄至3.5%，跌141點，收報3912點。港股兩邊拉扯，本地股頂得住，恆指倒升32點，國指跌197點，跌幅1.5%唔算太大。
內地股市止唔到血，聽高人話阿爺開始認定有人惡意做空期指，初步睇唔似係外資。阿爺昨晚又出招，提出嚴查惡意做空活動，中國證監發言人張曉軍回應，「證監會決定組織稽查執法力量對涉嫌市場操縱，特別是跨市場操縱的違法違規線索進行專項核查。對於符合立案標準的將立即立案稽查，嚴肅依法打擊，涉嫌犯罪的，堅決移送公安機關查辦！」
要留意「惡意做空」四個字，所謂惡意，係唔單止買吓賣吓，係有個不良善的動機，想做冧內地個市。話阿爺查過外資大行的活動，初步睇好正常，唔似係佢地搞嘢，即係話係內地猛人做呢的事。另一個要點是「跨市場操縱」，即係話在現貨和股指期貨兩邊隊，聞說其中一隻做空對象係上證500指數基金，昨日上證跌3.5%，佢俾人插到跌6.9%收場，上證500股份分散，阿爺唔易托，可以話係阿爺托市的「軟肋」，睇嚟對手唔簡單。上證500基金大跌令好多想沽呢個股指成份股的基金輸更多錢，更觸發贖回潮，加深大市下跌壓力。
阿爺鎖定有人玩嘢，話明要拉去俾公安查辦，呢一鑊係一場惡鬥，似乎都係針對政府的行為。要小心內地股市仍然波動。
外圍市場關注希臘今個星期日就債權人的經濟緊縮方案舉行的公投，歐洲股市偏軟，其中德國股市跌0.7%，法國股市跌1%。外圍投資氣氛麻麻，美股亦受到累走低，不過跌幅輕微，杜指跌28點，收報17730點，跌幅0.2%；標普500指數下跌不足1點，收報2077點；納指微跌4點至5009點。
週五係美國獨立日假日，因此將非農就業資料提前到昨日公佈。美國6月非農就業職位增長22.3萬，差過市場預期的22.5萬，失業率由上月的5.5%下跌至5.3%。創下自2008年春季以來新低，不過，報告指出，下降原因係有超過40萬人離開了就業大軍，令到基數大幅下降所致。另外，值得注意的是勞工部將4月及5月的非農就業資料，大幅向下修訂，4月份增幅由原來的22.1萬下修至18.7萬，5月增幅由28萬下修至25.4萬。
另外，最近一周的首次申請失業金人數增加1萬至28.1萬人，高過市場預期的27.5萬，亦係五周新高。而過去四周的平均值至275萬人，亦遠高過前值的226萬。反映美國勞動市場的復甦步伐，未如預期迅速。由於聯儲局加息的主要參考係美國勞動市場表現，就業情況無咁靚仔，又一定程式舒緩了市場對聯儲局9月加息之預期，係美股遠較歐股硬淨的主要原因之一。
陸羽仁
回應(7) 我想回應
陸羽仁 BLOG 舊文
