異動空間：等睇阿爺出絕招
阿爺救市越救越冧，昨日篇文講過，大陸散戶見中央晚晚出招、日日新政，心態已由清兵變逃兵，一心趁反彈出貨，結果又係人踩人收市。平心而論，早幾個月A股升到癲，家陣跌到反艇也是常識吧！滬綜指9 RSI仍有27，其實只是剛進入超賣水平，氣氛仍未算相當悲觀，見底言之尚早。
大陸人多謠言自然多，一係嚇死、一係笑死，click入新浪財經，魏力發現當眼位置多咗一欄謠言粉碎機（個名好似叮噹其中一件法寶），直播員會對於網上流傳的股市消息或傳聞，向監管當局進行求證，希望達到闢謠、穩定軍心目的。反正市差冇股炒，上去睇嚇謠言，望嚇股民吐苦水的精采留言，笑看跌市也不錯。執筆時有傳中證監出手查沽空數據，又向多個機構徵求救市方案，繼續出口術究竟有冇用？阿爺，咪再揮空拳了，都係快快出絕招救吧啦，13億人民睇住你表演呢！
恒指逆市微升，主要靠銀娛（027）、金沙（1928）升逾一成頂住，細價股則開始進入莊家熄燈、散戶恐慌式掟貨階段，伸手接刀，九死一生，奉勸戰友們出手前三思，要賭也不急在一時。
魏力
http://www.facebook.com/2012jason
魏力
異動空間 - 魏力 舊文
