魚樂無窮：從熱炒股搵滄海遺珠
■東瀛遊剛宣佈盈喜，預計中期盈利將升一倍。 資料圖片
阿爺瘋狂出招救市，奈何敵不過大媽沽盤，滬綜指終失守4000關，第二季升幅幾近蒸發，等同白做。港股看似硬淨，但只靠濠賭孖寶、友邦（1299）及中移動（941）力托，下跌股份近1,400隻，上升比例僅兩成。
上季內地孖展額1.5萬億人仔，如今指數重遊舊地，孖展額亦由高位降至2萬億人仔，相信場內及場外拆倉潮已近尾聲，加上大家對好消息視而不見，或係見底先兆，繼續靜心等待吧。
弱市之下，有一個板塊及一隻股份吸引到我嘅眼光。板塊係濠賭股，澳門宣佈調整持有中國護照旅客過境規定，首次過境逗留由五天增至七天，濠賭股久旱逢甘露，全線報復性反彈逾一成，挾淡倉力量應未完。
驚高追蝕底？可考慮當地餐飲股佳景（703），上月中已發盈警，今年累積跌幅超過四成，PB只得0.8倍，平絕同業（大家樂（341）4.4倍、大快活（052）4.9倍、翠華（1314）2.8倍），殘到無朋友，噚日僅升5%，博上番去密集區1.5元，都有一成水位。
股份係東瀛遊（6882），剛宣佈盈喜，預計中期盈利將升一倍，噚日順利破頂。追落後可揀專業旅運（1235），12倍PE，4.5厘息，市值奀豬5億，今年僅升16%，落後東瀛遊（期內升87%）幾條街，有望借勢炒番轉。
唐牛
https://www.facebook.com/tongcow88
唐牛
魚樂無窮 - 唐牛 舊文
