魚樂無窮：人仔貶值大贏家
■敏華一半生意來自北美，生產基地則在內地，完美受惠人仔貶值。 資料圖片
人民銀行突然出手，調低人民幣兌美元中間價近2%，成為市場焦點。人行新聞稿明言，人仔有效滙率相對全球多種貨幣表現較強，可以預期，人仔短期內將易跌難升，貶值之說隨即四起。首當其衝嘅，一定係做
人仔定存嘅食息一族，試想想，人仔定存息平均雖高達4厘，但今次貶值後，回報變相冇咗一半，仲未計潛在下跌機會。難怪銀行吸iBond退款時，都係以人仔做主打，鮮見有高息港元存款優惠。
與人仔滙率息息相關嘅股份，表現高下立見，內地航空股借美元買飛機，收入卻以人仔為主，完美雙輸，難怪東航（670）、南航（1055）、國航（753）齊齊墜機，跌幅全部一成過外。收入以美元為主嘅出口股，則飛上枝頭變鳳凰，今日推介嘅敏華控股（1999），正正係人仔貶值大贏家。
大贏家咁巴閉？冇錯，仲要三言兩語講得曬︰公司主要產銷梳化、床褥及床上用品等，一半生意來自北美市場，生產基地則在內地，意味收入係美元，成本係人仔，人仔貶值，敏華食曬兩家茶禮。
值得留意嘅係，主席黃敏利5月多番增持，平均價介乎8.642至9.039元，現價只得7.98元，水位夠曬。一隻概念十足股份，近三年盈利年年增長，兼有逾7厘息墊底，可謂抵食夾大件！
唐牛
https://www.facebook.com/tongcow88
唐牛
魚樂無窮 - 唐牛 舊文
