救經濟 出重招
2015年08月12日
人民銀行完善中間價機制，令人民幣匯價昨早急跌2%。有中環茶友收到料，立即打電話問點睇，當時個市聞訊升緊百幾點。我就話阿爺呢招，可能有兩個目的，一係同經濟基本面有關；二係涉及人仔納入國際貨幣基金會的特別提款權(SDR，即可作儲備貨幣)相關爭拗，估
計人仔雖然下調，相信幅度好難會同歐羅或日圓呢啲已完全自由兌換嘅貨幣咁大幅度。
貶值提振經濟，本來有利股市。中環茶友係船頭驚賊、船尾驚鬼嗰種人，聞言卻反問十幾二十年來，市場習慣了人仔只升不跌，今次會唔會顯示升值時代告終？如果佢匯價未來會轉趨波動，甚至加入貶值潮，咁會唔會好驚嚇㗎？
陸羽仁就答佢，中央呢次調整中間價，講出來的理由係技術性，無話要同日歐鬥大幅貶值。以中國狀況，都好難係一二十個巴仙咁樣劈低匯價。今次動作有機會係因為見唔係咁快可以攞到國基會的特別提款權貨幣地位，於是出手做嘢，順便同貶值國發出訊息，叫大家唔好肆無忌憚咁用匯率作為出口競爭武器。另外亦等如同美國講，人仔做唔到特別提款權貨幣，可能會再貶值㗎。
至於不少財經界人士話，人民幣貶2%令在岸官價更貼近人仔離岸價，人仔更貼近市場價，有利加入特別提款權。問題係對國基會有重大影響力的美國係唔係咁睇，定係唔想人仔貶值呢？
要全力推郁副偈
呢次人民幣貶值，有一個更明顯作用，係中央想全方位拉動經濟回升，中央呢幾日真係接連出好多招。據內地媒體報道，央行周二發佈的金融統計數據顯示，2015年7月份增加人民幣貸款1.48萬億元，同比，此前6月份貸款規模只有1.08萬億元。報道仲提到，央行這麼早公佈數據極為反常。市場估計阿爺想多宣傳貸款增多的訊息。
另外，阿爺仲發文件，建議有條件的企業可以星期五下午放假，讓員工可以有兩日半假期去旅行，鼓勵旅遊消費。中央要以不同手段推番郁副偈係正常做法。不過，人仔貶值呢記重招，就令人擔心跌開有條路，雖然人仔今次係因為調整中間價作一次性調整，內地事前亦曾預告會擴大波幅，但市場即時反應係觀望氣氛增加。瑞銀就估計，預料今年年底人民幣兌美元匯率降至6.5附近，之前估計為6.3，料明年底進一步貶值到6.6。
貶值雖然有利出口，同時觸發憂慮資金或外流。於國企改革及人幣貶值兩大主題下，A股市場做好及做淡互相角力，導致內地股市全日好淡爭持。上證略為高開，臨近中午挫逾1%，午後一度彈升1%，高見3970點，其後升勢回落，全日僅跌不足1點，差不多平手收市。滬深兩市成交增至1.3萬億元，連續兩日超過萬億元。
股市升後動力減弱
由於市場對人仔下調先喜後觀望，港股受惠隔夜美股急升後急上快落，有少少玩冰火味道。隨着人仔調價消息入市，恒生指數早段升幅擴大至403點，高見24924點，跟住就見沽盤湧出，加上內地股市反覆向下，尾市沽盤增加，最終港股倒跌收場，連帶24500點亦告失守。恒生指數收造24498點，跌22點；國企指數收報11264點，跌27點，成交加至961億元。個市去到昨日，明顯見到炒作動力減弱，好多熱股開始回吐。
雖然指數變動唔大，個別股份就因為匯價影響不同勁郁，結果有幸有不幸。人仔跌價大輸家最明顯係航空股，油價大升加上人民幣貶值夾擊下，國航(753) 是跌幅最大國企指數成份股，收造7.42元，大跌13%；南方航空(1055) 仲慘，瀉夠18%，報6.76元；東方航空(670) 大跌16%，造5.46元；至於國泰(293) 跌2%，報18.3元，都做咗包尾藍籌股。
人民幣貶值出口股受追捧。創科(669) 揚6.03%，報29元；利豐(494) 升5%，造5.73元，為最醒藍籌股；敏華(1999) 抽升9%，造7.98元。
陸羽仁
金融High Tea 舊文
