中環在線 - 李華華 2015年8月12日
中環在線：問條呔靚唔靚 全場鴉雀無聲
李澤鉅玩親民嚇親記者
■平日cool爆嘅李澤鉅，噚日全程笑笑口，問記者條呔靚唔靚時，更嚇到全場鴉雀無聲。 羅君豪攝 
■屈臣氏銅鑼灣旗艦店設嬰兒產品專賣部。 小超人李澤鉅一向畀人感覺冷淡與高傲，噚日下午佢「出巡」，親自到銅鑼灣鬧市，主持長和（001）旗下屈臣氏香港旗艦店開幕禮，已經令人嘖嘖稱奇，佢竟然仲一反常態，全程笑笑口，表現友善一面，又主動問在場記者佢條呔靚唔靚，可惜記者們一時唔慣佢呢款新態度，全部唔識反應，頓時鴉雀無聲。
平日cool爆 昨日露齒笑
小超人難得出巡，吸引大約50名傳媒到場採訪，場面逼爆。小超人以往無論業績會或股東會見記者都不苟言笑居多，答問題有時都寸寸哋，總之唔會讓記者好過。噚日佢可能見到咁多記者專登捧佢場，所以一改平日作風，變得十分友善。
李澤鉅「出巡」15分鐘實錄
14:55>> 【保鑣護駕】兩名著西裝的保鑣盯住李澤鉅座駕，幫手開路，座駕亦喺雙黃線旁停低。 影片截圖
14:56>> 【偷雞落車】座駕雙黃線停低之後，李澤鉅想偷雞落車，保鑣立即上前幫手開車門。
15:05>> 【熱情搶咪】儀式完成後，一向文靜嘅李澤鉅（中）主動提出「講多一句」，司儀好識做即時遞咪。
15:07>> 【推開貨品】李澤鉅買咗兩樽保健品，職員遞上貨品時，李澤鉅似想推開，原來係叫職員袋起啫。
小超人接近下午3點現身，見佢戴住一條湖水綠領呔，呢條其實係屈臣氏香港嘅公司呔，店長都係戴呢條。小超人快步埋位主持剪綵儀式，全程露齒笑，又配合公關指示影相，算係交足功課。
影相影到咁上下，以往嘅佢，通常開始有啲不耐煩，但佢竟然keep住笑容，然後揚一揚條呔，問記者「條呔靚唔靚呀？」似係想搞嚇氣氛。
呢一下真係嚇親大家，全場記者即時靜曬，司儀轉頭即刻話儀式結束，小超人又主動攞咪話要「講多一句」。
佢話「今日特別開心，屈臣氏集團喺全球開第一萬二千間舖頭。香港係我哋屋企嚟㗎，喺屋企創造一個新嘅里程碑，對我嚟講，係特別意義」。小超人心情咁好，記者自然打蛇隨棍上，問佢集團業務。
其實大家都預咗佢唔答，只係估唔到佢好溫柔咁解釋，話噚日係屈臣氏活動，要答長和（001）嘅嘢太耐，話「唔好意思，第日有適當環境，我哋再答其他嘅問題喇。」
嘩，呢位究竟係咪李澤鉅呀？巧驚驚呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
