中環在線：南豐哈佛富三代曝光
張添琳無架子笑容滿面
■陳慧慧（左）同乖女張添琳，齊齊展露甜美嘅笑容。 馮健鏗攝
本港老牌地產商南豐集團一向低調，甚少喺公開場合見到大股東陳氏家族嘅身影，不過噚日南豐舉辦時裝創業比賽，董事長陳慧慧就帶埋行政總裁梁錦松與一眾科技界名人，一齊捧場支持寶貝女
張添琳（Vanessa）負責嘅呢個項目，認真錫阿女。
台上致辭 少少怕醜
Vanessa樣子甜美，一口流利英語，廣東話反而唔係講得好純正。佢喺哈佛大學畢業，主修造景建築藝術（Landscape Architecture），近年就返南豐集團幫手打理家族生意，職銜非常之長，叫「地產發展及投資地產業務發展總監暨The Mills南豐紗廠負責人」，搞到司儀介紹佢出場嗰陣，都有少少喘氣。
Vanessa就話，自己喺企業發展部（Business Development）工作，而哥哥張世成、家姐張添珞就分別喺私人投資部與人事部幫手。佢𠵱家就專心搞The Mills呢個南豐紗廠活化計劃。
噚日嘅比賽就係The Mills嘅一部份，主要係幫助時裝startup公司，因為南豐係靠紡織業起家，所以好希望幫到業界。
呢個活動雖然長達3個小時，但Vanessa全程都坐定定，非常之專心，仲保持住甜美笑容，雖然佢喺台上致辭嗰陣有少少怕醜，但活動完結後，佢就好高興咁同在場嘉賓、參賽者合照傾偈，毫無架子。
睇怕佢要出席多啲公開場合練大個膽先得喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
