荷葉擎珠
2015年08月19日
內地股市升咗幾日，上證指數早段一度重返4000點，高見4006點，可惜累積升勢如荷葉擎珠，難抵東風一浪。自上周起重新炒作的國企改革概念股散咗，拖累大市失守4000關，之後不斷下挫，帶動上證指數午後分別跌穿3900及3800關口，全日跌超過6%收市，滬
深兩市有超過千股跌停，多日以來的升幅，俾淡風一吹就無咗，港股跟住內地跌，仲見埋今年收市低位。
結算前踩低A股
內地股市插得咁急，都有少少鬥早偷步沽貨嘅味道。呢個星期五為內地三大期貨八月結算日，市場憂慮「交割日魔咒」，淡友藉口擔心A股波動，於是借傳出國企改革重要前置文件或出台，趁利好消息借機出貨，搞到國企改革概念股帶頭下跌，就算路透社引述知情人士報道，中國政府將加快退稅流程及處理速度，以支持出口，對個市都無幫助。到下晝跌得咁急，就有啲借意踩低味道。
之前兩個交易日，內地股市上升，港股都要跌，呢鋪內地跌得咁甘，港股又跌，連跌三日，全日挫逾三百點，失守23500關，挨近低位收市，恒生指數收造23474點，挫339點；國企指數收報10770點，跌192點，成交增至808億元。
中環茶友話，悶戰最消磨人的意志，依家市場係淡底，喺咁狀況下自然係跌多過升。不過到周五結算日，不排除阿爺會大力少少護盤。
A股大跌，內險及內地證券股傷。國壽(2628) 、平保(2318) 挫近3%，中信證券(6030) 挫3.7%，造20.7元；海通證券(6837) 跌3.3%，報13.56元。另外，安碩A50(2823) 插4.5%，收11.4元。跌市焦點之一的國企改革概念股捱沽，之前大升的洛陽玻璃(1108) 急瀉17%，中石化油服(1033) 挫12%，報2.58元；中船防務(317) 都跌8%，造23.35元。
比亞迪(1211) 完成發行2015年第一期公司債券，發行總額為15億元人民幣，票面利率4.1%，該股隨大市受壓，現為包尾國企指數成份股，收造33.75元，挫5%，旗下比亞迪電子(285) 跌勢更急，收造5.71元，大跌逾9%，可能反映市場風險胃納下降，對高負債同要資金發展的股份戒心增加。
本地大公司陸續宣佈上半年業績，部份開始反映零售業嘅放緩。九倉(004) 公佈截至6月底止中期業績，純利倒退四成，不過睇真就無咁得人驚。佢半年核心盈利按年增加5%至52.58億元，主要反映投資物業表現強韌，盈利大跌主要因為投資物業重估盈餘較去年減少37.27億元，以及計入因綠城不再為集團聯營公司後產生非經常性會計虧損14.91億元。
地產股壓力隱現
九倉期內投資物業收入增加12%至71.74億元，表現算唔錯，細睇時代廣場收入增加7%，營業盈利亦增加6%，但六月底出租率達92%，弱化跡象才剛開始。呢個財政年度上場做主席的吳天海坦言，上半年面對很大挑戰，包括經營環境、貨幣大起大跌，各地經濟放緩，仲有香港自身一啲問題。
商場租金有幾年合約，調整會有時差，所以股價好多時係跑快過租金趨勢，雖然公佈業績唔算好差，但九倉股價昨日就創咗一年新低，收市報44.15元，跌2.9%。同屬商場股的恒隆地產(101) 呢幾日跌穿20元大關後，同錄一年新低，另外地產股中新世界(017) 同太地(1972) 都係見咗低價，顯示地產股都有壓力。以前賣樓一般都有收租部份托住，依家就係收租部份被人睇淡，睇怕收租比例重的地產股未來仲有壓力。
陸羽仁
金融High Tea 舊文
