魚樂無窮：學懂三招免陰乾
■A股只得剎那光輝，午後一瀉如注。 路透社
A股只得剎那光輝，午後一瀉如注，中證500指數期貨更插水9.6%，較現貨大低水逾4%，股指期貨周五結算，阿爺明言不托市，殺戮場面似乎無可避免。港股連跌三日，累挫逾500點，陰乾格局未改。睇真啲，恒指已跌穿去年底收市
價23605點，意味今年白做，如果你今年炒股有錢贏，恭喜你，你成功跑贏大市，勁過唔少老散。不過咪開心住，恒指距離上月股災低位22836點僅600多點，現階段淡友步步進逼，下一秒鐘隨時破底，如何保住手頭利潤，成為今年致勝關鍵，唐牛綜合了三個方法，大家不妨參考。
第一式︰Draw錢走人。正所謂有錢就身痕，呢隻買啲嗰隻買啲，每隻輸一千幾百，條數都好襟計，倒不如draw錢走人，放在銀行好，吃喝玩樂好，總好過不停進貢。
第二式︰減少睇報價。見到股票大平賣，總會心思思入市，須知而家唔係大時代，炒落易過炒上，博贏五格只會換來輸多十格，除非你轉身極快，否則一動不如一靜，唔睇報價，就係讓你靜下來嘅最佳方法。
第三式︰遠離炒友。WhatsApp、WeChat、facebook充斥大量炒股group，相信你都有一兩個在手，群組中總有些打不死嘅戰士，不停話有好嘢，如果冇咁上下定力，好容易跟衝埋一份，結果如何？大家心中有數吧！
唐牛
https://www.facebook.com/tongcow88
唐牛
魚樂無窮 - 唐牛 舊文
