魚樂無窮：三類人不宜博反彈
港股連挾兩日，成交增加至逾千億元。 李潤芳攝
港股連挾兩日，累升1,500點，成交增加至逾千億，第一日唔信，第二日開始動搖，此刻心思思嘅你，係咪諗緊入唔入場走番轉？歌舞昇平總讓人忘記以往跌市嘅傷痛，但如果你係以下三類人，唐牛建議閣下繼續忍手。
1）滿手蟹貨
。點解你會成手蟹貨？因為高追？非也！高買可以高賣，死因係你唔肯止蝕，今次反彈唔係大時代，未輪到你做股神，稍一不慎隨時又艇過，既然手上咁多貨，升市同樣受惠，無謂再叉隻腳入嚟啦。
2）朝九晚五工作。今次反彈，要金睛火眼望實，低買高沽，轉身慢啲都死。你只能夠偷睇手機報價，遮遮掩掩，落盤竟然要去廁格，炒得咁辛苦，只會事倍功半。
3）阿愁上身。大陸貿易數據差到冇朋友、儲局下星期話唔定會加息、股災月又殺埋身……若上述因素成日喺你腦海出現，入市只會瞓唔安坐唔樂，何必呢。
惠理（806）埋單3%升幅都冇，不合格！今日推介打孖上，希望增加命中率。第一隻︰英皇證券（717），現價0.64元，僅較早前內地金融機構龍頭入股價高一格，券商股有力食住反彈浪再衝高，值博！第二隻︰恒輝（185）。新主成本價0.33元，現價0.226元，深潛逾三成，殘爆！呢個位入場安全度十足，舞上空間卻無限大！
唐牛
https://www.facebook.com/tongcow88
唐牛
魚樂無窮 - 唐牛 舊文
