中環在線：愛駒表現差 退役後去騎術學校
陳南祿自嘲「冇馬運」
天時地利喺新馬季已退役；右為陳南祿。
身兼馬董嘅恒隆地產（101）董事總經理陳南祿（Philip）噚日自爆「冇馬運」，事關兩年前買落嘅「天時地利」，喺新馬季已經退役，目前喺內地騎術學校退休。至於另一隻佢有份嘅團體馬「快寶
駒」，佢自嘲有頭威、冇尾勢，上季幾場比賽早段都跑得唔錯，但偏偏最後200米「唔上力」，未能為佢帶來多啲獎金。
幫馬會推銷新玩法
Philip隻「天時地利」表現認真曳，出賽5次，唔係包尾就係尾二，不過Philip打算再接再厲，新馬季入紙再買馬。噚日佢喺飯局上又推銷馬會即將推出嘅「組合獨贏」，話可以方便馬迷揀頭馬喎。
簡單講，馬會會將每場賽事嘅出賽馬匹分成三個投注組別，以獨贏賠率為例，分別為兩匹熱門馬、三匹嘅半熱門馬、其他就係冷門，每個組合嘅賠率會浮動。
大家以後落注買頭馬，仍可以喺十數隻入面揀選一隻，或者買「組合獨贏」，落注熱門、半熱門同埋冷門三個選擇。Philip話，新玩法肯定會被外圍非法搶客，希望有部關門做嘢。
提起馬，恒隆助理董事關則輝就話，將會邀請騎師訓練學校校長陳念慈下月到公司演講，主題係如何跳出comfort zone。陳念慈為昔日本港著名羽毛球員，1988年曾代表香港參加奧運，並聯同陳智才奪得混雙項目銅牌。
陳念慈退役後，佢由運動員身份跳出來，從事管理工作，包括喺馬會擔任發展經理、7年前更成為馬會見習騎師學校第一位女校長，確實係一個勵志故事。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
