股場放大鏡：中國建築受惠棚改
港股連續兩日大幅彈升，與其說是單純的挾淡倉，倒不如說是全球性的股市報復性反彈，昨日最亢奮日本股市，就彈升了7.7%，日經指數升幅達到1,343點，是21年來最大單日升幅，21年喎，的確唔簡單。
睇外電，日股升市其中一個原因是首相安倍晉三聲稱將削減企業
所得稅至少3.3%，因而刺激日股越升越多，但翻查日本財政部網頁，原來日本政府早已承諾自今個財政年度開始將企業所得稅率由34.6%減至2016財年的31.3%，即係話減稅消息是舊聞而已。國際財金消息流傳快亦有相當高透明度，Bloomberg機查兩查就知消息堅定流，因此好難相信炒起日股的資金是炒錯了消息，真正升市原因肯定另有其事。事實上，春江鴨周二突然不問價入市掃貨，港股升得勁快，當中必有玄機，當然好消息係乜事後至知。
大市有可能轉勢，入市慢咗唔緊要，最重要是揀中適當的股票，近日內地媒體放風棚改投資將會加碼，且銀行亦會特別鬆手助棚改工程融資。所謂棚改實際上是舊區重建，如將舊住戶遷去新區，有助短暫解決樓市供應過剩，同時重建又消耗一批過剩產能，一舉兩得。
受惠股主要是水泥股及承建商股，目前內地最大承建商股是中國建築（3311），該公司股價過去數月已勁跌三成，股價竟低過去年第三季水平，估值方面亦勁低殘，現年PE僅10倍而明年8倍，盈利透明度也高，此估值已反映近期分析員作出的盈利預測下調，因此是相當安全可靠的一個落注。
歐陽風
本欄逢周一、四刊出
歐陽風
股場放大鏡 - 歐陽風 舊文
