異動空間：救市姿勢才重要
個市悶到嘔，美國9月加息與否，將決定後市殺落定挾上，本周公佈的8月非農就業數據好關鍵，不如等埋先再盤算。A股繼續頂閱兵，掃內銀基建了無新意，公安四圍去券商、報館拉人封艇，風頭火勢邊個敢入場？家陣A股似乎得番國家隊撐住，成交薄弱唔夠8,000億人仔，一唔頂就掟到
散曬，猶如吸毒一樣只會泥足深陷，李小加話救火要緊，之後再談「姿勢」，但救得咁樣衰，信心必定大打折扣，一個投資者冇信心的股市，任你再掃都係倒錢落海。
冇股好推，不用講嚇殼股。過去兩年，殼股表現可說是獨領風騷，殼價升值仲快過樓，兩年之間主板殼由兩、三億，推到上五、六億，升幅一倍。本港殼股供不應求炒到癲，皆因內地IPO經常暫停，上市條隊由銅記排到尖嘴，唯有南下借殼上市。但隨著A股爆煲，不少老闆身家大縮水，加上市場氣氛惡劣，上市估值都唔慌高，故據聞不少借殼商討已暫停。殼股需求驟降，莊家順手熄燈free fall；已賣殼的更加冇得守，舉例說朸濬（1355），1.53元全購，目前得番1.1元，市值跌僅3.5億元。
魏力
http://www.facebook.com/2012jason
魏力
異動空間 - 魏力 舊文
