金手指：不問價追靄華
■靄華押業股價曾試過一周升三成。 資料圖片
上周一傍晚孫柏文交咗「QE4指日可待」呢篇稿，到當晚九點半花旗國股市開市，道指即刻裂口跌咗成千點。到周末花旗國民意都係覺得「股市大跌呀」。但上周就算花旗國日日chok到飛起，其實到禮拜五收市係完全收復失地，微升。點解？咪
就係佢哋開始相信會有QE4，量化寬鬆又來了！
風險管理快過銀行
呢刻聯儲局啲有投票權嘅委員，意見極分歧，上周Dudley行出來畀到人QE嘅感覺，周末Jackson Hole會議副主席Fischer繼續話「一切照舊，9月加息」。但呢六年零息世界畀到我哋最大嘅感覺係乜？就係美國人係最怕痛。而家民意已被上周股市波幅嚇親，仲要人民幣好合作咁增值，即係我國中央都同美國人話：「你要我滙美元唔貶值，引發全球貶值戰的話，咁就唔該量寬啦！」
問題係點炒？因中國經濟真係五癆七傷，而再量寬亦都未能幫助炒賣。大陸同香港嘅信貸監管機構都會逼啲銀行收緊信貸風險，故之前啲大熱未必能食盡條水。故今日我就叫大家不問價追靄華押業（1319）！睇開本欄都知我喺個半月前，高過現價叫大家買靄華，由篇文出街開市價計，一周後最高升三成。之後全球股市在美國佬都懶理照話加息下大插，由最高跌差不多五成，又到垂涎三尺價位。
點解要買押業公司？當金管局捽啲銀行要收緊信貸，特別係樓價不明朗時，要借錢嘅人就要幫襯好似靄華呢啲公司。佢哋每單放債嘅期都短、利息高，現時市值約10億元，但風險管理就會快過銀行。仲要因聯儲局有望QE，佢自己嘅資金鏈唔會斷，故當客要搵佢，佢又有錢去做生意，簡直係完美。唔知可唔可以學上次咁一周後已升三成，但當聯儲局未來幾日逐漸放風好hea咁加息，靄華就會係咁俾人掃。所以買就要快，要不問價追靄華！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
