魚樂無窮：股民是如何煉成的
■有證券行向大學生提供優惠，開闢新客源。 資料圖片
股市靜到嘔泡，首當其衝除咗股民，仲有一班股票經紀。旺市齋靠傭金都賺到笑，連埋自己炒嗰份，夠魚翅撈飯有餘了；淡市呢？客仔雞飛狗走，傭金少一大截；自己落場？個市難炒成咁，唔輸已經萬幸。唐牛突然想起，幾年前成交慘
淡時，唔少經紀要揸的士幫補生計嘅一幕。
「而家大市成交keep住成千億，唔會咁陰公啩。」股市唔同賭場，賭場一味靠turn，只要有人落注，賭場自然有錢賺。股市呢？從來睇升嘅人係大多數（有幾多人靠沽空發達吖），個市大跌多咗一批蟹，少咗一批客，橫行、悶市又少一批客，再咁落去，成交一定萎縮。
塘水滾塘魚唔係辦法，開闢新客源先係王道。有證券行向大學生埋手，一單交易只收3.88元，兼送一個月股票報價，優惠期長達4年。一張學生證咁多著數，恨死唔少戰友。有人話叫未有經濟基礎嘅大學生炒股，有違道德標準，我就話如果因為咁搞到財困、連累屋企人，呢個大學生要反省下讀咁多書吸收咗啲乜。
你以為大學生炒股太早？廣州市有36間中小學，新學期正式開設金融理財知識教育地方課程，小學生都要計市盈率、學財技，完美贏在起跑線。如果我係老師，第一件事一定係叫學生遠/股，點解？你懂的！
唐牛
https://www.facebook.com/tongcow88
唐牛
魚樂無窮 - 唐牛 舊文
