中環在線：「實發」好日 上市儀式巧遇
柯清輝馮孝忠敍舊講唔停
■柯清輝（左）同馮孝忠曾經喺恒生共事過，噚日碰面雞啄唔斷。 李潤芳攝
噚日真係大好日子，娛樂圈有黃曉明與Angelababy等三對新人擺酒結婚，港交所（388）亦有5隻新股掛牌，港交所要拎三個大銅鑼出來畀5位上市公司主席
一齊敲鑼，認真高興！
根據風水師麥玲玲所講，噚日係「成日」，有成功嘅意思，雖然並非全年最好日，但係適宜開市、嫁娶，加上10月8日，諧音「實發」，大家當然like喇。難怪5隻新股都揀呢日掛牌，股價表現都唔錯㖭呀。
呢日亦造就恒生銀行（011）前行政總裁柯清輝，與恒生執董馮孝忠敍一敍舊。
話說新股捐100萬元畀公益金，就可以揀股票冧巴，公益金籌募委員會主席兼恒生行政總裁李慧敏噚日有事在身，由馮孝忠代收支票。咁啱有「柯大俠」之稱嘅柯清輝係內衣新股維珍妮（2199）嘅獨董，兩人共事過一段日子，碰面自然雞啄唔斷。
雖然柯清輝離開恒生6年，但原來兩人平時都有見面，馮孝忠形容，柯清輝係佢恩人，帶佢出身，佢唔敢忘本，至今都好尊敬對方，每次見面都好好傾咁話。
■洪遊奕（右）送上不銹鋼bra，由港交所上市委員會成員周翊祥代收。 
■五間公司喺「實發」好日上市，要三個銅鑼先夠敲。 維珍妮向港交所送不銹鋼bra
馮孝忠仲知道點解柯清輝幫維珍妮做獨董，佢話，柯大俠係滙豐trainee出身，年輕時主要做中小企客戶，因此認識維珍妮呢間老牌廠商都唔出奇。而且，柯大俠與維珍妮主席洪遊奕都係福建人，好易啱傾。
講到維珍妮，佢噚日送咗一個用不銹鋼做嘅「絕世大bra」畀港交所，閃令令，遠望以為係卡通片聖鬥士星矢嘅頭盔。洪遊奕指，呢個大bra出自雕塑藝術家，似對翼有祝福港交所展翅高飛嘅意思，足足準備咗4個月咁耐。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
