中環在線：去年辭任總裁 人走茶未涼
中金上市 朱雲來成焦點
■朱雲來（左）企喺中金主席丁學東（中）旁邊，依然搶鏡。右為首席執行官畢明建。 李潤芳攝
內地龍頭投行中金（3908）由國務院前總理朱鎔基之子朱雲來執掌超過十年，基本上，市場將中金與朱雲來畫上等號，雖然朱雲來舊年辭任總裁一
職，現於中金冇職銜，但中金噚日掛牌上市大日子，佢當然都有出席，而且輕易成為全場焦點，不停俾人拉住影相。
朱雲來貫徹低調有禮嘅風格，有人上前攀談、拉住佢影相，佢都來者不拒，不過佢對於傳媒始終保持較大距離，一如以往，唔肯交換名片，說話一句起兩句止。
■港交所主席周松崗（左）畀面出席上市儀式。右為丁學東。 稱現時研究經濟
華華噚日問佢離開中金之後，忙緊乜東東？佢只係笑笑口拋出8個字「看看經濟，研究研究」，之後就唔再講，跟手被工作人員拉走咗。
搵番資料，58歲嘅朱雲來舊年10月辭任中金總裁之後，現時係清華教授，有時會見到佢出席大型財金論壇做演講嘉賓，好似今年6月，佢出席上海陸家嘴論壇，話如果官方可以控制「慢牛」、「有那麼大本事就好了」。7月佢又去新加坡出席論壇，大談A股暫停IPO並非長久之計，可見佢十分掌握目前國內經濟狀況。
中金之所以咁巴閉，因為佢係首間中外合資投行，1995年成立，朱雲來1998年加入，過去多隻大型國企來港上市，中金都有份參與，如中石油（857）、國壽（2628)。今年保薦嘅新股，例如華融（2799）、聯控（3396）、中再保（1508）都係重點新股。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
