智取大市：收爐前唔強唔揸
A股升，恒指跌，但港股個股走個別，噚日有二、三線股單日升一成左右，其中，大連港（2880）亦爆升8%，反映恒指連跌兩日，但整體市況其實係比起一個星期前好轉，至少你揀啱股可以唔理恒指點走，總好過上個星期一潭死水，隻隻唔上又唔落。股市最慘唔係跌，係唔上唔落。股
市升代表而家有機會，股市跌代表將來有機會，唔上唔落就等如而家冇賺錢機會，亦唔知幾時先有機會。
以噚日情況，大家要小心個股兩極化情況，持股走勢弱就要換強勢股，你睇一批科網股、券商股強者越強，同時又有創維（751）瘋狂洗倉，所以策略係唔強唔揸，務求令自己lead得住，覺得自己手風順之時，先再有信心買其他嘢。直至市場情緒突然高漲，成交大增，突然變得好好炒，又feel到自己揸到成手貨先至安心，唔夠貨就好焦慮，呢個位反而係撤退嘅時候。
近排強開嘅股，以科網股、券商股為主，呢批股未見得出現派貨跡象，既然市場口味偏好呢兩類股，相信呢兩類股喺未來短時間內，只會繼續偏強。
券商類方面，港交所（388）噚日一度急衝3%，即市急回，反映220元有短線阻力，但難得股價波幅增加，同時成交未算多，未見派貨跡象，200元守得幾穩，220元照計唔係乜嘢大關口，後市配合深港通消息，要破220元，唔難。
英皇證券有條件再升
港交所繼續強，之前推介過本地券商例如國泰君安（1788）又升咗唔少，咁啱落後本地券商股圖表都幾靚，啱啱先開車幾日，成交開始活躍，英皇證券（717）照計有條件升多浸。
英皇證券喺今年3月宣佈二供一股兼配股，每股作價0.5元，供股過後，原本5月打算以每股1.5元配售大約4.44億股，點知遇上7月大跌市，令每股1.5元配股唔成。喺7月7日，港股剩番半條命之際，轉為0.88元配股，配股數目削半至2.22億股。當日收市價係0.58元，但大戶依然肯用高溢價0.88元接貨。
值得留意嘅係，8月已經係大跌市過後，但大戶對於英皇證券嘅股票念念不忘，仍希望再可以低價加注，結果如願以償，大股東喺8月再以每股0.63元配售2.3億舊股，總數同當初打算配售4.44億股相若，所以配股正式儲夠貨。
兩批配股平均接貨價0.75元左右，只係同現價差不多，呢個亦係大戶喺大跌市之中仍然願意接貨嘅價錢，只要市況好番少少，當然唔止呢個價；事實上，英皇證券喺11月初股價跌到去0.63元就回升，證明配股價有相當支持力，噚日收市價0.76元，喺呢個價附近跟大戶上車，配合年底前市況衰極有個譜，應當相當穩陣。
英皇證券第一個阻力位會係7月配股價0.88元，但承券商股續強勢，年底前要挑戰1元似乎不難。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
