A股放水抗加息
2015年11月10日
內地股市繼續上升，但港股未能跟上。美國年底加息機會高，香港照跟機會大，唔似得內地可以有自己的利率政策，佢仲減緊息，所以恒指唔跌已經算叻。
美國上星期公佈的就業數據強勁，聯儲局加息機會現時估計高達七成。同十月份唔同嘅係，當時中國經濟下行壓力好大，美國加息導致
資金流出，隨時爆出大鑊，拖咗個幾月後，內地同歐洲紛紛作出應對，放水安排相繼出籠，故此見到美國加息步聲漸近，市場反應暫時仲幾鎮定，美股繼續喺歷史高位徘徊之餘，內地喺雙降浮力支持下，昨日都仲有得升，市場仲估內地如果數據唔靚，又會有提振招數出籠，一於托住個底。
阿里「散銀」買南早？
內地用放水對抗美國加息，A股喺央企概念板塊爆上激發利好氣氛，上證指數收報3646點，升56點，持續創兩個半月高位；深成指數報12453點，升179點，兩市成交仲增至1.36萬億人民幣。
雖然內地造好，港股就唔係幾得，指數反覆向下，尾市仲有一輪沽盤湧出，搞到恒生指數全日跌過百點收市，恒指收造22726點，跌140點；國企指數收報10506點，跌49點，成交795億元。
港股跟唔上A股，只能夠講香港息口跟美國，點都擺脫唔晒加息嘅陰影，尤其過去兩日二手樓市交投弱弱哋，大家都驚地產市道下調會影響本地道。
內地重啟新股上市，但A股無腳軟，內地投行中金公司(3908) 喺呢種氣氛下首掛，全日收11.04元，較招股價10.28元，高出7.4%，高位11.44元，低位10.9元，成交1.43億股。不計手續費及佣金，一手400股賺304元，有啲爆冷味道之餘，令大力唱淡者睇咗眼鏡。
中金董事長丁學東在上市儀式後就話，內地重啟新股上市(IPO)，反映中國股市開始回復正常，總之股價造好，投資者就講乜都啱聽。
上星期《南華早報》換老總，引起不少猜測。內地英文《中國日報》報道指，阿里巴巴正與南華早報集團(583) 磋商，擬部份或全部收購《南華早報》。雙方均未有就傳聞回應，之後《中國日報》已抽起相關報道。
阿里買起南早集團的消息在圈中流傳過一段日子，對阿里或股東馬雲來說，買起港媒所費只是「散銀」，但呢類行動政治意義超過經濟意義，考慮點不在金錢層面。南華早報集團因公眾持股量不足，目前已停牌逾兩年，至今仍未復牌，不過消息就令報紙股稍為造好。
由中國海外(688) 分拆出來的中海物業(2699) 再創上市新高。呢隻股係中國海外分拆送畀股東，由於無成本，所以市價好難估計，但佢自出世後股價大漲小回，累積升幅接近七成。
中海物業主要做屋苑管理，同類公司有彩生活(1778) 。彩生活一樣係分拆出來，母公司係花樣年，?家彩生活市值72億元，中海物業係57億元。如果只計母公司實力，當然係中國海外強大啲，所以中海物業一路掃上，掛牌後追趕彩生活，好多小股東自然落於食胡套現。
中海小股東「下欄」和味
物業代理股份上市，?家據講仲有一家叫中奧到家，由於佢係獨立物管公司，唔會分拆形式上市，故此有可能會IPO上市，該公司為了做大做強，準備在行內進行併購。
大地產公司做物業管理，本來係附加服務，但經過多年發展，就變成一門增值生意，大家發覺利錢唔錯，呢啲「下欄」相當和味。如果公司分拆送畀股東，大家唔使錢收禮物，好多人趁股價上升沽貨，咁仲加開心多兩錢。
陸羽仁
金融High Tea 舊文
