魚樂無窮：5億市值盈喜股
■鴻福堂預計全年業績將錄得盈利。 資料圖片
前輩教落，炒股贏錢與否，入市時機重要性，遠大於股票本質。舉個例，你4月大時代追入騰訊（700），成本價起碼160蚊，呢個moment賬面仲輸緊，股王都幫唔到你。唐牛第四季推介績優股特步國際（1368），出街至今累
積升幅17%，表現可人，可惜建議買入價太保守，完全hit唔到，今季成績表註定空白一片。
今日推介鴻福堂（1446），上周五破旗而上，但依然處於水底價，只要好好把握入市時機，大把水位！公司上周發盈喜，由於採購流程改善、成功推行節約成本措施，加上大埔廠房試產完成，以及本年度沒有一次性上市開支及上市前購股權計劃酬金開支，預計全年業績將錄得盈利，去年則錄得虧損3,830萬元。
「咁多一次性因素，有水份喎！」唔好忘記，而家只係11月中，但已可預示全年賺錢，證明業績一定有番咁上下。鴻福堂主要喺中港從事樽裝飲品、其他草本產品及小食零售、批發及分銷，去年7月上市，但因業績強差人意，股價拾級而下，投資價值卻因此浮現︰最新市值只得奀豬5.2億，連殼價都未夠，以一隻turnaround股來說，未免平得過份。呢轉趁盈喜炒番轉，保守用7億市值做目標，可見1.07元，屆時依然較招股價1.3元平幾條街。
唐牛
https://www.facebook.com/tongcow88
唐牛
魚樂無窮 - 唐牛 舊文
