笑到最後：
中國電動車如何普及
上星期吉利（175）公佈，計劃五年內轉型為新能源車企，目標至2020年，新能源車銷量佔總銷量九成。而喺Tesla之前，電動車只係一年一度新聞花絮，車廠出一兩架只可遠觀嘅電動車扮環保，然後繼續出油車。自Tesla之後，大家都覺得電動車呢個概念行得通，間
間車廠都話要整電動車。
再次證明「萬般皆下品，惟有美帝高」，但凡任何創新、突破、力排眾議嘅事，都只應該交由美國做，其他鄰近經濟強國要成功，就做永恒嘅「阿二」：當美國創出新模式後照抄照搬，又或者做人哋創新科技嘅工廠。
因為創新相對概念，唔係某人所講嘅「設計」。有一個人創新，潛台詞係話緊其他所有既得利益者係廢柴。就好似Uber出現，其實就係話緊全個的士行業不思進取咗幾十年，服務追唔上需求，所以先要有Uber淘汰的士。不過，當一個地方最後都係選擇保護既得利益，又點會擁抱創新？
農村包圍城市諗得過
鄰近經濟強國嘅強項係抄，由ICQ、eBay、Paypal到Google，所有美國成功科網都會有個強國版，而個強國版亦會發大達，反而真係諗唔到強國有乜科網係自行發明。
講返電動車，Tesla係賣有型，相反睇吉利同比亞迪（1211），由價錢、速度同外型，都係賣普及，同埋做商用車。
Tesla賣畀有閒階級，用市場定位解決充電慢過入油嘅問題。但係中國牌子好難做到有型，向普及方向賣係唯一出路，比亞迪的士喺香港嘅經驗證明唔係好成功，因為充電時間影響搵食。
同一個道理，將電動車賣畀一般城市打工仔，其實都有啲勉強，因為一旦普及，量多就要面對充電問題，全世界大城市都係擠逼，停車場電動車車位最多可能只佔十分一。泊低過夜將充電會面對充電位不足，如果要排隊充電一粒鐘，普羅大眾未必如有閒階級咁得閒。
城市講求效率同速度，入油快同方便呢個優勢不變。電動車充電速度未能同入油睇齊前，行普及路線，應要先向落後地方著手，地方大，喺屋企拎個拖板出門口已可充電，同時，鄉下人較有時間同耐性等候。揀新能源車股，行普及路線嗰堆，高明會揀行「農村包圍城市」策略嘅車股。
高明
即上偶像派財演高明專頁：
https://www.facebook.com/bigricetea
本欄逢周一刊出
高明
笑到最後 - 高明 舊文
