一周三件：百仕達等爆升
■百仕達手執兩個在中國一級大城市裏面超筍地段的房產項目。圖為集團主席鄧銳民。 資料圖片
百仕達控股（1168）淨現金連股票價值，超過公司總市值，買百仕達，等於免本揸住集團喺上海兩個極靚房產項目。
百仕達到今年6月尾淨現金近28億元，連埋高流動性證券資產9.8
億元計，總值近38億元，已經超過曬集團本身市值35億元。家陣花費0.99元買1股百仕達，都未嚟得及反映淨現金同股票價值。
持兩大型房產項目
仲要咁睇，百仕達家陣手執上海市長寧豪宅區住宅項目「寧國府邸」，同上海外灘「洛克．外灘源」綜合項目。兩個都係喺一級大城市裏面超筍地段，兼唔使等好耐，分別喺明年同後年落成。
綜合報載資料，上海區豪宅，喺今年第二季發力，成交同比一枝箭大升430%，個別樓盤所講平均呎價，去到2.17萬港元！又同策諮詢研究部資料，上海市頭三季，每方呎上萬港元豪宅，成交344套，創咗歷史新高。
上邊寧國府邸面積得14.6萬平方呎，但肯定超值租，而家陣買百仕達，兼免本揸呢個兩個上海筍盤！百仕達曾喺深圳內房佔一席位，隨集團沽清深圳內房項目，呢轉祖國係深圳樓市發癲，唔關佢事，但上海project超肥仔增值在後頭。
唔計呢兩壇製作，百仕達家陣0.4倍PB，姐妹系威華達（622）0.65倍PB；百仕達1年累升59%，都係小兒科，威華達同期放紙鳶，升咗140%！百仕達PB平過威華達，兼落後過威華達。
啱啱周五，百仕達上1,000萬股成交，係一個月最大成交日，聞到有味，博百仕達追番上威華達PB，現價0.99元講緊要升62%，到1.6元。
錢雋
細價股專家
本欄逢周一、三、五刊出
錢雋
一周三件 - 錢雋 舊文
